മെഡിസെപ്​ യാഥാർഥ്യമായി; മറ്റ്​ ആനുകൂല്യങ്ങൾ നിർത്തലാക്കില്ലെന്ന്​ മുഖ്യമന്ത്രി

തിരുവനന്തപുരം: ജീവനക്കാർക്കും പെൻഷൻകാർക്കും കുടുംബാംഗങ്ങൾക്കുമായി സംസ്ഥാന സർക്കാർ നടപ്പാക്കുന്ന ആരോഗ്യ ഇൻഷുറൻസ്​ പദ്ധതിയായ മെഡിസെപ്​ യാഥാർഥ്യമായി. സെൻട്രൽ സ്​റ്റേഡിയത്തിൽ നടന്ന പ്രൗഢ ചടങ്ങിൽ മുഖ്യമന്ത്രി പിണറായി വിജയൻ ഉദ്​ഘാടനം ചെയ്തു. മെഡിസെപ്​ ഉള്ളതു​കൊണ്ട്​ മറ്റ്​ ആനുകൂല്യങ്ങൾ നിർത്തില്ലെന്നും സാമൂഹിക സുരക്ഷ ഉറപ്പാക്കുന്നതിൽ വിട്ടുവീഴ്ച ഉണ്ടാകില്ലെന്നും മുഖ്യമന്ത്രി പറഞ്ഞു.

പദ്ധതിയിൽ​ 300 ഓളം ആശുപത്രികളെ എംപാനൽ ചെയ്തു. സംസ്ഥാനത്തിന്​ പുറ​ത്തെ 15 ആശുപത്രികളുമുണ്ട്​. അവയവമാറ്റ സൗകര്യമുള്ള ഒരാശുപത്രിയെങ്കിലും എല്ലാ ജില്ലയിലും പദ്ധതിയുടെ ഭാഗമാണ്​. മെഡിസെപ്​​ നടപ്പാക്കിയശേഷവും സൗജന്യ ഒ.പി ചികിത്സ തുടരും. ഡോക്ടർ സർട്ടിഫിക്കറ്റും ബില്ലുകളും രേഖകളും നൽകിയാൽ മുമ്പത്തെപോലെ തുക മടക്കി നൽകും. വിവിധ വകുപ്പുകളിൽ ശുചീകരണ ജോലി അടക്കം ചെയ്യുന്ന അരലക്ഷത്തോളം പാർട്ട്​ ടൈം ജീവനക്കാരെ ഇതിൽ ഉൾപ്പെടുത്തി. ജീവനക്കാരുടെയും പെൻഷൻകാരുടെയും പ്രീമിയം മുൻകൂറായി സർക്കാർ നൽകും. 12 ഗഡുക്കളായി ശമ്പളത്തിൽനിന്നും പെൻഷനിൽനിന്നും പിടിക്കും. അവയവമാറ്റത്തിനും സഹായം നൽകും. ഭിന്നശേഷിക്കാരായ കുട്ടികൾക്ക്​ അനുകൂല്യം ഉറപ്പാക്കാൻ പ്രായപരിധി നടപ്പാക്കിയിട്ടില്ല.

പദ്ധതിക്കെതിരെ ദുഷ്ടലാക്കോടെയുള്ള പ്രചാരണം ജനം തള്ളും. പ്രീമിയം 5664 രൂപയും ജി.എസ്​.ടിയും മാത്രമാണെന്നും ബാക്കി 336 രൂപ സർക്കാർ തട്ടിക്കുന്നെന്നുമായിരുന്നു ആരോപണം. മെഡിസെപിന്‍റെ ഭാഗമായി 12 മാരകരോഗങ്ങൾക്കും അവയവമാറ്റത്തിനും ഉപയോഗിക്കുന്ന കോർപ​സ്​ ഫണ്ടിലേക്കാണ്​ ഈ തുക​. സർക്കാർ ഒരുരൂപ പോലും നൽകുന്നില്ലെന്ന്​ ആരോപിക്കുന്നവർ സർക്കാർ ഗാരന്‍റി പരിഗണിക്കുന്നില്ല. ആ ഗാരന്‍റിയുടെ മൂല്യത്തിലാണ്​ 6000 രൂപക്ക്​ അവയവമാറ്റം അടക്കമുള്ള പദ്ധതി ലഭ്യമായത്​. ഇപ്പോഴത്തേതിന്‍റെ മൂന്നിരട്ടി നൽകിയാലും കിട്ടാത്ത കവറേജ്​ മെഡിസെപിലുണ്ട്​. ക്ഷേമ പ്രവർത്തനത്തിൽനിന്ന്​ സർക്കാർ പിന്മാറണമെന്ന വാദം ശക്തമായി ഉയരുന്ന കാലത്ത്​ കേരളം മു​ന്നോട്ടുവെക്കുന്ന ബദൽ കൂടിയാണ്​ മെഡിസെപ്​. സാർവത്രിക ആരോഗ്യ സുരക്ഷ ഉറപ്പാകുന്ന സംസ്ഥാനമാകാൻ മെഡിസെപ്​ സഹായിക്കുമെന്നും മുഖ്യമന്ത്രി പറഞ്ഞു.

മന്ത്രി കെ.എൻ. ബാലഗോപാൽ അധ്യക്ഷതവഹിച്ചു. മന്ത്രിമാരായ റോഷി അഗസ്റ്റിൻ, എ.കെ. ശശീന്ദ്രൻ, അഹമ്മദ്​ ദേവർകോവിൽ, ആന്‍റണി രാജു, വി. ശിവൻകുട്ടി, ജി.ആർ. അനിൽ തുടങ്ങിയവർ പ​ങ്കെടുത്തു.