ആരാണ് വലിയവൻ എന്ന തർക്കത്തിന് ക്രിസ്തു നൽകിയ ഉത്തരമാണ് കാൽകഴുകൽ -കാതോലിക്ക ബാവ

വാഴൂർ: ആരാണ് വലിയവൻ എന്ന ശിഷ്യരുടെ തർക്കത്തിന് യേശുക്രിസ്തു നൽകിയ ഉത്തരമാണ് മഹത്തരമായ കാൽ കഴുകലെന്ന് ഓർത്തഡോക്സ് സഭാധ്യക്ഷനും മലങ്കര മെത്രാപ്പോലീത്തായുമായ ബസേലിയോസ് മാർത്തോമ മാത്യൂസ് തൃതീയൻ കാതോലിക്ക ബാവ. പെസഹാദിനത്തിൽ മാതൃദേവാലയമായ വാഴൂർ സെന്‍റ്​ പീറ്റേഴ്സ് പള്ളിയിൽ നടന്ന കാൽകഴുകൽ ശുശ്രൂഷക്ക് മുഖ്യകാർമികത്വം വഹിക്കുകയായിരുന്നു അദ്ദേഹം.

വാഴൂർ സെന്‍റ്​ പീറ്റേഴ്സ് ഓർത്തഡോക്സ് പള്ളിയിൽ പുലർച്ച രണ്ടിന്​ പെസഹാ ശുശ്രൂഷയും കുർബാനയും നടന്നു. ഉച്ചക്ക് 2.30ന് കാതോലിക്ക ബാവയുടെ മുഖ്യകാർമികത്വത്തിൽ നടന്ന കാൽകഴുകൽ ശുശ്രൂഷയിൽ ആറ്​ കോർഎപ്പിസ്​കോപ്പമാരുടെയും ആറ്​ വൈദികരുടെയും കാലുകൾ കഴുകി.

ചീഫ് വിപ് ഡോ.എൻ. ജയരാജ്, സഭയിലെ കോർഎപ്പിസ്​കോപ്പമാർ, റമ്പാന്മാർ, വൈദികർ, വൈദിക സെമിനാരി വിദ്യാർഥികൾ തുടങ്ങി നിരവധിപേർ ശുശ്രൂഷകളിൽ പങ്കെടുത്തു. ദുഃഖവെള്ളിയാഴ്ച നടക്കുന്ന ആരാധനകൾക്ക് കാതോലിക്ക ബാവ മുഖ്യകാർമികത്വം വഹിക്കുമെന്ന് വികാരി ഫാ. ബിറ്റു കെ. മാണി, സഹവികാരി ഫാ. ജേക്കബ് ഫിലിപ്പോസ് എന്നിവർ അറിയിച്ചു.