മാത്തൂർ പഞ്ചായത്തിൽ ഇനി 'സാർ' ഇല്ല, അതുകൊണ്ട്​ ആരും 'അപേക്ഷിക്കേണ്ട'; ഭരണസമിതിയുടെ ​വേറിട്ട തീരുമാനം ഇങ്ങനെയാണ്​

പാലക്കാട്​ ജില്ലയിൽ മാത്തൂർ പഞ്ചായത്ത്​ ഭരണസമിതി കഴിഞ്ഞ ദിവസം ഐകക​ണ്​​​േഠ്യന ഒരു പ്രമേയം പാസാക്കി; ഇനി മുതൽ പഞ്ചായത്ത്​ ഒാഫീസിൽ സാറും മാഡവും ഉണ്ടാകില്ല. എട്ട്​ കോൺഗ്രസ്​ അംഗങ്ങളും ഏഴ്​ സി.പി.എം അംഗങ്ങളും ഒരു ബി.ജെ.പി അംഗവും ഒരുപോലെ പിന്തുണച്ച ഈ തീരുമാനം കേട്ട്​ ആരും ഞെ​േട്ടണ്ട. സാറും മാഡവും ഇല്ലെങ്കിലും ഒാഫീസിൽ ചേട്ടനും ചേച്ചിയുമുണ്ടാകും, ​സ്വന്തമായി പേരുള്ള ജീവനക്കാരെല്ലാം ഉണ്ടാകും.

വിവിധ ആവശ്യങ്ങൾക്കായി പഞ്ചായത്ത്​ ഒാഫീസിലെത്തുന്നവർ ഉദ്യോഗസ്​ഥരെയോ ഭരണസമിതി അംഗങ്ങളെയോ 'സാർ', 'മാഡം' തുടങ്ങിയ വാക്കുകളുപയോഗിച്ച്​ അഭിസംബോധന ചെയ്യുന്നത്​ അവസാനിപ്പിക്കാനാണ്​ ഭരണസമിതി പ്ര​മേയം പാസാക്കിയത്​. ബ്രിട്ടീഷ്​ കാലത്തിന്‍റെ ശേഷിപ്പുകൾ ജനാധിപത്യരാജ്യത്ത്​ ആവശ്യമില്ലെന്നാണ്​ ഭരണസമിതി ചുണ്ടികാണിക്കുന്നത്​.

'സാർ', 'മാഡം' എന്നിവക്ക്​ പകരം ഉദ്യേഗസ്​ഥരെയും ഭരണസമതി അംഗങ്ങളെയും അവരുടെ പേരുകളോ തസ്​തിക നാമങ്ങളോ വിളിക്കാം. ഒാരോ ജീവനക്കാരും മേശക്ക്​ മുകളിൽ പേരും തസ്​തികയും പ്രദർശിപ്പിക്കും. ഒാഫീസിലെത്തുന്നവർക്ക്​ മുതിർന്ന ഉദ്യോഗസ്​ഥരെ പേരു വിളിക്കുന്നത്​ അനാദരവായി തോന്നുന്നുണ്ടെങ്കിൽ ചേട്ടനെന്നോ ചേച്ചിയെന്നോ വിളിക്കാം. ഇതു കൂടാ​തെ, ഉചിതമായ വാക്ക്​ നിർദേശിക്കാൻ ഔദ്യോഗിക ഭാഷാ വകുപ്പിനോട്​ ഭരണസമിതി ആവശ്യപ്പെടുകയും ചെയ്​തിട്ടുണ്ട്​.

​സേവനങ്ങൾ ആവശ്യപ്പെട്ട്​ നൽകുന്ന രേഖകളിലും കത്തുകളിലും 'അപേക്ഷിക്കുന്നു', 'അഭ്യർഥിക്കുന്നു' തുടങ്ങിയ വാക്കുകൾ ഒഴിവാക്കണമെന്നും​ ഭരണസമിതി ആവശ്യപ്പെടുന്നുണ്ട്​. പകരം 'അവകാശപ്പെടുന്നു', 'താൽപര്യപ്പെടുന്നു' തുടങ്ങിയ വാക്കുകൾ ഉപയോഗിക്കാം.

ജനാധിപത്യ രാജ്യത്ത്​ ഉദ്യോഗസ്​ഥരും ജനപ്രതിനിധികളും ജനങ്ങളുടെ സേവകർ മാത്രമാണെന്ന്​ വൈസ്​ പ്രസിഡന്‍റ്​ പി.ആർ പ്രസാദ്​ അവതരിപ്പിച്ച പ്രമേയം ചൂണ്ടികാണിക്കുന്നു​. ജനങ്ങളാണ്​ പരമാധികാരികൾ. അവകാശങ്ങൾ ലഭിക്കാൻ മറ്റുള്ളവരുടെ ദയക്കായി കാത്തിരിക്കേണ്ടി വരരുതെന്നും പ്രമേയം പറയുന്നു.

ബഹുമാന വാചകങ്ങൾ ഉപയോഗിക്കാത്തതിനാലോ 'അപേക്ഷിക്കാത്തതിനാലോ' ആർക്കെങ്കിലും സേവനങ്ങൾ തടസപ്പെട്ടാൽ പഞ്ചായത്ത്​ പ്രസിഡന്‍റി​നെയോ സെക്രട്ടറി​യെയോ ബന്ധപ്പെടാമെന്ന്​ ഒാഫീസിന്​ മുന്നിൽ എഴുതിവെച്ചിട്ടുണ്ട്​.