മുഖ്യമന്ത്രിയെ വിടാതെ മാത്യു കുഴല്‍നാടന്‍; സഭയെയും സാമാജികരെയും തെറ്റിദ്ധരിപ്പിച്ചതിന് അവകാശലംഘന നോട്ടീസ്

തിരുവനന്തപുരം: നിയമസഭയില്‍ അടിയന്തരപ്രമേയ ചര്‍ച്ചക്കിടെ വസ്തുതാവിരുദ്ധമായ കാര്യം പറഞ്ഞ് സഭയെയും സാമാജികരെയും തെറ്റിദ്ധരിപ്പി​െച്ചന്നാരോപിച്ച്​​ മുഖ്യമന്ത്രി പിണറായി വിജയനെതിരെ മാത്യു കുഴല്‍നാടന്‍ എം.എല്‍.എ അവകാശ ലംഘനത്തിന്​ നോട്ടീസ് നല്‍കി. ചട്ടം 154 പ്രകാരം നടപടി ആവശ്യപ്പെട്ടാണ്​ സ്പീക്കര്‍ക്ക് നോട്ടീസ്​ നൽകിയത്​.

പ്രൈസ് വാട്ടര്‍ ഹൗസ് കൂപ്പേര്‍സ് സ്ഥാപനത്തിന്‍റെ ഡയറക്ടര്‍ ജെയ്ക് ബാലകുമാർ മെന്‍റർ ആണെന്ന്​ മുഖ്യമന്ത്രിയുടെ മകള്‍ വീണ വിജയന്‍റെ ഉടമസ്ഥതയിലുള്ള കമ്പനിയുടെ വെബ്സൈറ്റില്‍ പറഞ്ഞിരുന്നത് മാത്യു കുഴല്‍നാടന്‍ നിയമസഭയിൽ ചൂണ്ടിക്കാട്ടിയിരുന്നു. ഇത് പച്ചക്കള്ളമാണെന്ന്​​ മറുപടി പറഞ്ഞ മുഖ്യമന്ത്രി, അങ്ങനെ ഒരാൾ മെന്‍ററര്‍ ആണെന്ന് മകള്‍ ഒരുഘട്ടത്തിലും പറഞ്ഞിട്ടില്ലെന്നും സത്യവിരുദ്ധ കാര്യങ്ങൾ അവതരിപ്പിച്ച്​ എന്തും പറയാമെന്നാണോയെന്നും ക്ഷോഭത്തോടെ പ്രതികരിച്ചു.

മുഖ്യമന്ത്രിയുടെ പ്രതികരണം വസ്തുതാവിരുദ്ധമാണെന്നും ആര്‍ക്കൈവ്‌സ് രേഖ പ്രകാരം 2020 ​േമയ് 20 വരെ വീണയുടെ കമ്പനിയുടെ വെബ്സൈറ്റില്‍ ജെയ്ക് ബാലകുമാര്‍ കമ്പനി സ്ഥാപകരുടെ മെന്‍ററര്‍ ആണെന്ന് രേഖപ്പെടുത്തിയിരുന്നുവെന്നും കുഴൽനാടൻ പറയുന്നു. ജെയ്ക് ബാലകുമാറുമായുള്ള പ്രഫഷനല്‍ ബന്ധ​െത്തക്കുറിച്ച് ചാനൽ അഭിമുഖത്തിൽ വീണ വ്യക്തമാക്കിയിട്ടുമുണ്ട്. ഇതിന്‍റെ തെളിവുകളും നോട്ടീസിനൊപ്പം നല്‍കിയിട്ടുണ്ട്​.