‘ശുചീകരണം’ തുടങ്ങി; മോട്ടോർവാഹനവകുപ്പ്​ ചെക്ക്​പോസ്റ്റുകളിൽ ഉദ്യോഗസ്ഥർക്ക്​ കൂട്ട സ്ഥലം മാറ്റം

കോട്ടയം: സംസ്ഥാനത്തെ മോട്ടോർ വാഹന വകുപ്പ്​ ചെക്ക്​പോസ്റ്റുകളിൽ ‘ശുചീകരണം’ തുടങ്ങി. ഈ മാസം മൂന്നിന്​ ട്രാൻസ്​പോർട്ട്​ കമീഷണർ സി.എച്ച്​. നാഗരാജു പുറപ്പെടുവിച്ച സർക്കുലറിന്‍റെ അടിസ്ഥാനത്തിൽ മലപ്പുറം, പാലക്കാട്​ തുടങ്ങി പ്രധാന ജില്ലകളിലെ അതിർത്തി ചെക്ക്​പോസ്റ്റുകളിൽ ജോലിയുണ്ടായിരുന്ന മുഴുവൻ മോട്ടോർ വാഹനവകുപ്പ്​ ജീവനക്കാരെയും സ്ഥലംമാറ്റി ജോയന്‍റ്​ ട്രാൻസ്​പോർട്ട്​ കമീഷനറുടെ ഉത്തരവ്​ പുറത്തിറങ്ങി.

മാറ്റം ലഭിച്ച എല്ലാ ഉദ്യോഗസ്ഥരും അവരുടെ മാതൃയൂനിറ്റുകളിൽ റിപ്പോർട്ട്​ ചെയ്യണമെന്നാണ്​ ഉത്തരവ്​. അതിന്​ പുറമെ ഈ ജില്ലകളിലെ ചെക്​​പോസ്റ്റുകളിൽ രാവിലെ ഒമ്പത്​ മുതൽ അഞ്ച്​ മണി വരെ ഡ്യൂട്ടി ചെയ്യുന്നതിന്​ രണ്ട്​ എം.വി.ഐമാർ ഉൾപ്പെടെ 19 ജീവനക്കാരെയും നിയോഗിച്ചു. ഇവർക്ക്​ ഈ മാസം 20 വരെ 15 ദിവസത്തേക്ക്​ മാത്രമാണ്​ ചെക്ക്​പോസ്റ്റിലെ ജോലി. അത്​ കഴിഞ്ഞാൽ ഇവരെ മാറ്റി പുതിയ ജീവനക്കാരെ നിയോഗിക്കും. ട്രാൻസ്​പോർട്ട്​ കമീഷനർ പുറത്തിറക്കിയ ഉത്തരവിലെ നിബന്ധനകൾ ഇവർക്ക്​ ബാധകമാണെന്ന്​ ഉത്തരവിൽ പറയുന്നു.

രാത്രികാലങ്ങളിലാണ്​ ചെക്ക്​പോസ്റ്റുകളിൽ കൈക്കൂലി വ്യാപകം. അതിനാൽ, വൈകുന്നേരം അഞ്ച്​ മണിക്ക്​ ശേഷം ചെക്​ ​പോസ്റ്റുകളിൽ ആരെയും തുടരാൻ അനുവദിക്കരുതെന്നും ഉത്തരവിലുണ്ട്​. ഇലക്​ട്രോണിക്​ ചെക്ക്​പോസ്റ്റ്​ നിലവിൽ വന്നിട്ടും നിരവധി ഉദ്യോഗസ്ഥരാണ്​ തുടർന്ന്​ വന്നത്​.

ഗതാഗത കമീഷണറുടെ പഴയ ഉത്തരവ്​ ദുർവ്യാഖ്യാനം ചെയ്തായിരുന്നു ഈ നീക്കം. ഇക്കാര്യം ‘മാധ്യമം’ നേരത്തെ റിപ്പോർട്ട്​ ചെയ്തിരുന്നു. അതി​ന്‍റെ അടിസ്ഥാനത്തിലാണ്​ ചെക്ക്​പോസ്റ്റുകളിൽ ജീവനക്കാരുടെ എണ്ണം കൂടുതലാണെന്നും അതിനാൽ ഇവിടങ്ങളിലെ ജീവനക്കാരുടെ സേവനം മറ്റ്​ ഓഫിസുകളിൽ വിനിയോഗിക്കണമെന്നും നിർദ്ദേശിച്ച്​ ഗതാഗത കമീഷണർ സർക്കുലർ പുറത്തിറക്കിയത്​.

ജീവനക്കാരെ മാറ്റിനിയമിച്ചത്​ മൂലം ചെക്ക്​പോസ്റ്റുകൾ കേന്ദ്രീകരിച്ചുള്ള അഴിമതി കുറയുമെന്നാണ്​ വിലയിരുത്തൽ.