സമുദ്ര മത്സ്യബന്ധന നിയന്ത്രണചട്ടം: ഹൈകോടതി വിശദീകരണം തേടി

കൊച്ചി: യന്ത്രവത്​കൃത ബോട്ടുകളുടെ പ്രവർത്തനം നിയന്ത്രിക്കുന്ന 2018ലെ കേരള സമുദ്ര മത്സ്യബന്ധന നിയന്ത്രണചട്ടം പിൻവലിക്കണമെന്ന്​ ആവശ്യപ്പെടുന്ന ഹരജിയിൽ ഹൈകോടതി കേന്ദ്ര-സംസ്​ഥാന സര്‍ക്കാറുകളുടെ നിലപാട് തേടി. പരമ്പരാഗത മത്സ്യത്തൊഴിലാളികളുടെ ക്ഷേമവും മത്സ്യസമ്പത്ത് സംരക്ഷണവും ലക്ഷ്യമിട്ട്​ സംസ്ഥാന സര്‍ക്കാര്‍ കൊണ്ടുവന്ന ചട്ടം യന്ത്രവത്​കൃത ബോട്ടുകളോടുള്ള വിവേചനമാണെന്ന് ചൂണ്ടിക്കാട്ടി ഫിഷിങ് ബോട്ട് ഓപറേറ്റേഴ്‌സ് അസോസിയേഷന്‍ കൊല്ലം ജില്ല ഭാരവാഹികളായ ചാര്‍ളി ജോസഫ്, പീറ്റര്‍ മത്യാസ് എന്നിവര്‍ നൽകിയ ഹരജിയിലാണ്​ നടപടി.

പുതിയ ചട്ടപ്രകാരം നിശ്ചിത പ്രദേശത്ത് മാത്രമേ യന്ത്രവത്​കൃത ബോട്ടുകള്‍ക്ക് പ്രവര്‍ത്തിക്കാനാവൂവെന്ന്​ ഹരജിയിൽ പറയുന്നു. തീരത്തുനിന്ന് 22.2 കിലോമീറ്റര്‍ അകലെ സമുദ്രത്തില്‍ മത്സ്യബന്ധനം നടത്താന്‍ പ്രത്യേക രജിസ്‌ട്രേഷനും ലൈസന്‍സും വേണം. ഇതിന് വന്‍തുക ചെലവ് വരും. കൂടാതെ, വന്‍കിട കപ്പലുകളുമായും ട്രോളറുകളുമായും മത്സരിക്കേണ്ടി വരുന്നു. ഇത് പ്രായോഗികമായി സാധ്യമല്ല. കേന്ദ്രത്തി​​​െൻറ അധികാരപരിധിയില്‍ വരുന്ന പ്രദേശം സംബന്ധിച്ച് സംസ്ഥാന സര്‍ക്കാര്‍ കൊണ്ടുവന്ന ചട്ടം നിയമപരമായി നിലനില്‍ക്കി​ല്ല. ചട്ടം റദ്ദാക്കണമെന്നും 1980 ലെ ചട്ടത്തിനനുസരിച്ച്​ ന്യായമായ ഫീസ്​ മാത്രം ഇൗടാക്കി മത്സ്യബന്ധനത്തിന്​ അനുവദിക്കണമെന്നുമാണ്​ ഹരജിയിലെ ആവശ്യം.