മരട് അപകടം: വിദ്യാലക്ഷ്മിക്കും ലതക്കും നിറകണ്ണുകളോടെ യാത്രാമൊഴി

കൊച്ചി: മരടിൽ സ്കൂൾ വാൻ കുളത്തിലേക്ക്​ മറിഞ്ഞുണ്ടായ അപകടത്തിൽ മരിച്ചവർക്ക് നിറകണ്ണുകളോടെ യാത്രാമൊഴി. മരട് കിഡ്സ് വേൾഡ് പ്രീ സ്കൂളിലെ വിദ്യാർഥി വിദ്യാലക്ഷ്മി (നാല്), ആയ ലത ഉണ്ണി (45) എന്നിവരുടെ മൃതദേഹങ്ങളാണ് പൊതുദർശനത്തിനുശേഷം സംസ്കരിച്ചത്. 

പരിക്കേറ്റ്​ ആശുപത്രിയിൽ പ്രവേശിപ്പിച്ച മരട് ജനത റോഡ് വൻപുള്ളി വീട്ടിൽ ജോബി ജോർജി​​​​​​െൻറ മകൾ കരോലി​​​​​​െൻറ (അഞ്ച്) സ്ഥിതി ഗുരുതരമായി തുടരുന്നു. അതേസമയം, വാൻ ഡ്രൈവർ മരട് ജയന്തി റോഡിൽ മിനക്കേരി വീട്ടിൽ അനിൽകുമാർ (45) അപകടനില തരണം ചെയ്തതായി ആശുപത്രി അധികൃതർ അറിയിച്ചു. 

മരട്​ അപകടത്തിൽ മരിച്ച വിദ്യാലക്ഷ്​മിയുടെ മൃതദേഹം സംസ്​കാരത്തിന്​ വാടകവീട്ടിൽനിന്ന്​ അമ്മയുടെ സ്വദേശമായ പട്ടിമറ്റത്തേക്ക്​ കൊണ്ടുപോകുന്നു. ചിത്രം : ദിലീപ്​ പുരയ്​ക്കൽ

 

കാക്കനാട് വാഴക്കാല ഐശ്വര്യയില്‍ സനൽകുമാർ-സ്മിഷ ദമ്പതികളുടെ മകളായ വിദ്യാലക്ഷ്മിയുടെ മൃതദേഹം ഉച്ചക്ക് 12വരെ മരട് ആയത്തുപറമ്പിലെ വാടകവീട്ടിൽ പൊതുദർശനത്തിനുവെച്ചു. അധ്യാപകരും സഹപാഠികളും ജനപ്രതിനിധികളും ഉൾപ്പെടെ നിരവധിപേർ അന്ത്യോപചാരം അർപ്പിച്ചു. തുടർന്ന് സ്മിജയുടെ പട്ടിമറ്റത്തെ വീട്ടിലേക്ക്​ കൊണ്ടുപോയി. ഒരുമണിയോടെ വീട്ടുവളപ്പിൽ സംസ്കരിച്ചു.

കുട്ടിയുടെ വിദ്യാഭ്യാസത്തിനായാണ് സനൽകുമാറും കുടുംബവും ഏതാനും മാസം മുമ്പ് മരടിൽ വീട്​ വാടകക്കെടുത്തത്. ലത ഉണ്ണിയുടെ മൃതദേഹം മരട് വിക്രം സാരാഭായ് റോഡിലെ വസതിയില്‍ പൊതുദര്‍ശനത്തിനു​െവച്ചു. നിരവധിപേർ അന്ത്യോപചാരം അർപ്പിക്കാനെത്തി. ഉച്ചക്ക്​ 12ഒാടെ മരട് നെട്ടൂര്‍ ശാന്തിവനം ശ്മശാനത്തില്‍ സംസ്‌കരിച്ചു. നിര്‍മാണ തൊഴിലാളിയായ ഉണ്ണിയാണ് ഭര്‍ത്താവ്. മക്കള്‍: ഐശ്വര്യ, ലക്ഷ്മി. 

മരട്​ അപകടത്തിൽ മരിച്ച വിദ്യാലക്ഷ്​മിയുടെ മൃതദേഹം ​പൊതുദർശനത്തിന്​ വെച്ചപ്പോൾ നിറകണ്ണുകളോടെ അ​​േന്ത്യാപചാരം അർപ്പിക്കുന്നവർ. ഫോട്ടോ: ദിലീപ് പുരക്കൽ

 

മരിച്ച ലതയുടെ രണ്ടുമക്കളുടെയും വിദ്യാഭ്യാസ ചെലവ് പ്രഫ. കെ.വി. തോമസ് വിദ്യാധനം ട്രസ്​റ്റ്​ ഏറ്റെടുക്കും. ഇരുവരുടെയും പേരിൽ നാലുലക്ഷം രൂപ മരട് സർവിസ് സഹകരണബാങ്കിൽ ദീർഘകാലത്തേക്ക് നിക്ഷേപിക്കുമെന്ന് മാനേജിങ് ട്രസ്​റ്റി പ്രഫ. കെ.വി. തോമസ് എം.പി അറിയിച്ചു. 

അതിഗുരുതരാവസ്ഥയിൽ കുരുന്ന്​ കരോലിൻ
കൊച്ചി: മരടിൽ സ്കൂൾ വാൻ കുളത്തിലേക്ക്​ മറിഞ്ഞുണ്ടായ അപകടത്തിൽ പരിക്കേറ്റ്​ എറണാകുളത്തെ സ്വകാര്യആശുപത്രിയിൽ കഴിയുന്ന കരോലി​​​​​​െൻറ സ്ഥിതി അതിഗുരുതരമായി തുടരുന്നെന്ന് ആശുപത്രിവൃത്തങ്ങൾ അറിയിച്ചു. ശ്വാസകോശത്തിൽ ചളികലർന്ന വെള്ളം നിറഞ്ഞതാണ് നില വഷളാക്കിയത്. വ​​​​​​െൻറിലേറ്ററി​​​​​​െൻറ സഹായത്തോടെയാണ് കുട്ടിയുടെ ജീവൻ നിലനിർത്തുന്നത്. കരോലിനും അപകടനില തരണം ചെയ്ത ഡ്രൈവർ അനിൽകുമാറും തീവ്രപരിചരണ വിഭാഗത്തിൽ നിരീക്ഷണത്തിലാണ്.