മൻസൂർ വധം: ലക്ഷ്യമിട്ടത്​ സഹോദരനെയെന്ന്​ പ്രതിയുടെ മൊഴി; ഇന്ന്​ സമാധാന ചർച്ച

കണ്ണൂർ: പാനൂർ പുല്ലൂക്കര മുക്കിൽ പീടികയിൽ ലീഗ്​ പ്രവർത്തകൻ മൻസൂറിനെ കൊലപ്പെടുത്തിയ അക്രമിസംഘം ലക്ഷ്യമിട്ടത്​ സഹോദരൻ മുഹ്​സിനെയെന്ന്​ കസ്റ്റഡിയിലുള്ള പ്രതിയും സി.പി.എം പ്രവർത്തകനുമായ ഷിനോസ്​. പൊലീസിന്​ നൽകിയ മൊഴിയിലാണ്​ ഇക്കാര്യം വ്യക്​തമാക്കിയത്​. കൊല്ലപ്പെട്ട മൻസൂറിന്‍റെ അയൽവാസിയാണ്​ ഷിനോസ്​.

പ്രദേശത്ത്​ ഒാപൺ വോട്ടുമായി ബന്ധപ്പെട്ട പ്രശ്​നം ഉടലെടുത്തിരുന്നു. ഇതിന്​ പ്രതികാരമായി ബൂത്ത്​ ഏജന്‍റ്​ കൂടിയായ മുഹ്​സിനെ ഭീഷണിപ്പെടുത്താനും കൈയേറ്റം ചെയ്യാനുമാണ്​ സി.പി.എം പ്രവർത്തകർ അന്ന്​ രാത്രി എട്ടുമണിയോടെ ഇവരുടെ വീടിനടുത്തെത്തിയത്​. മുഹ്​സിനെ ഭീഷണിപ്പെടുത്തുന്നത്​ കണ്ട്​ അനുജൻ മൻസൂർ ഓടിയെത്തുകയായിരുന്നു. തുടർന്ന്​ ഇരുവരെയും അക്രമികൾ വളഞ്ഞു. ഓടിരക്ഷപ്പെടുന്നതിനിടെ ബോംബെറിഞ്ഞ്​ വീഴ്​ത്താൻ ശ്രമിച്ചു. ബോംബേറിൽ മൻസൂറിന്‍റെ​ കാൽമുട്ടിന്​ താ​ഴെ ചിന്നിച്ചിതറി. ഇതിൽനിന്ന്​ രക്​തം വാർന്നാണ്​ മരണം സംഭവിച്ചത്​.

സ്​ഫോടന ശബ്​ദംകേട്ട്​ അയൽവാസികളും മൻസൂറിന്‍റെ കുടുംബക്കാരും ഓടിയെത്തിയതോടെ അക്രമികൾ രക്ഷപ്പെടാൻ ശ്രമിച്ചു. എന്നാൽ, സംഘാംഗമായ ഷിനോസിനെ മുഹ്​സിൻ കീഴ്​പ്പെടുത്തി പൊലീസിൽ ഏൽപ്പിക്കുകയായിരുന്നു.

പ്രാദേശിക സി.പി.എം നേതൃത്വത്തിന്‍റെ അറിവോടെയാണ്​ അക്രമികൾ പ്രദേശത്ത്​ എത്തിയതെന്നാണ്​ വിവരം. കൊലപാതക കേസിൽ പ്രതിയായയാൾ അക്രമം നടക്കുന്നതിന് മണിക്കൂറുകള്‍ക്ക് മുമ്പ് വാട്‌സാപ്പില്‍ പങ്കുവെച്ച സ്റ്റാറ്റസ് പൊലീസ്​ ഗൗരവ​ത്തിലെടുത്തില്ലെന്ന്​ പരാതിയുണ്ട്​. 'മുസ്ലീംലീഗുകാര്‍ ഈ ദിവസം വര്‍ഷങ്ങളോളം ഓര്‍ത്തുവെക്കും, ഉറപ്പ്' എന്നാണ് ഇയാള്‍ വാട്‌സാപ്പില്‍ പങ്കുവെച്ച സ്റ്റാറ്റസ്. ഉച്ചയോടെ ഭീഷണി സ്റ്റാറ്റസ് വാട്‌സാപ്പിലൂടെ പുറത്തുവന്നു​വെന്നും ഇതേക്കുറിച്ച് പൊലീസിനെ അറിയിച്ചെങ്കിലും പൊലീസ് ഗൗരവമായി എടുത്തില്ലെന്നും എം.എസ്.എഫ് സംസ്ഥാന ട്രഷറര്‍ നജാഫ് ആരോപിച്ചു.

മൻസൂറിനെ കൊല​െപ്പടുത്തിയതിന്​ പിറകിൽ രാഷ്​ട്രീയ ലക്ഷ്യങ്ങളുണ്ടെന്ന്​ പൊലീസ്​ കമീഷണർ ഇള​ങ്കോ തന്നെ വ്യക്​തമാക്കിയിരുന്നു. സംഭവത്തിൽ ഉൾ​പ്പെട്ടവർക്കായി അന്വേഷണം നടക്കുകയാണെന്നും പത്തിലധികം ആളുകൾ കൊലപാതകത്തിൽ പ​ങ്കെടുത്തിട്ടുണ്ടെന്നും അദ്ദേഹം മാധ്യമങ്ങളോട്​ പറഞ്ഞു.

െകാലപാതകം ആസൂത്രിതമാണെന്നാണ്​ മുസ്​ലിം ലീഗ്​ നേതാവ്​ പി.കെ. കുഞ്ഞാലിക്കുട്ടി, പ്രതിപക്ഷ നേതാവ്​ രമേശ്​ ചെന്നിത്തല എന്നിവർ പ്രതികരിച്ചത്​. എന്നാൽ, സംഘർഷത്തിന്‍റെ ഉത്തരവാദിത്വം ലീഗിനാണെന്നും ആസൂത്രിത കൊലപാതകമല്ലെന്നും​ സി.പി.എം നേതാവ്​ എം.വി. ജയരാജൻ പ്രതികരിച്ചു. ​പ്രാദേശികമായ സംഘർഷമാണ്​ കൊലപാതകത്തിന്​ പിറകിലെന്നാണ്​ സി.പി.എം സംസ്​ഥാന സെക്രട്ടറിയുടെ ചുമതലയുള്ള എ. വിജയരാഘവൻ പറഞ്ഞത്​.

​കൊലപാതകത്തെ തുടർന്ന്​ അക്രമസംഭവങ്ങൾ അരങ്ങേറിയ പ്രദേശത്ത്​ സമാധാനം പുനസ്​ഥാപിക്കാൻ ഇന്ന്​ ജില്ലാ ഭരണകൂടത്തിന്‍റെ നേതൃത്വത്തിൽ സർവകക്ഷി സമാധാന ചർച്ച നടക്കും.