ഞാനെന്‍റെ ജനതയെ ഒറ്റുകൊടുക്കില്ല, ബി.ജെ.പി ആശയങ്ങളോട് യോജിപ്പില്ല - നിലപാട്​ വ്യക്തമാക്കി മണികണ്ഠൻ

കൽപറ്റ: ബി.ജെ.പിയോട് അനുഭാവമില്ലെന്നും അവരുടെ ആശ‍യങ്ങളോട് ഒരുനിലക്കും യോജിക്കാനാകില്ലെന്നും മാനന്തവാടിയിൽ സ്​ഥാനാർഥിയായി ബി.ജെ.പി പ്രഖ്യാപിച്ച സി. മണികണ്ഠൻ. തന്നോട്​ ചോദിക്കാതെയാണ് പേര്​ പ്രഖ്യാപിച്ചത്​. തെരഞ്ഞെടുപ്പ് രാഷ്​ട്രീയത്തിലേക്കില്ല. പണിയ വിഭാഗത്തിൽനിന്നൊരാളുടെ പേര്, ബി.ജെ.പി കേന്ദ്ര നേതൃത്വം പ്രഖ്യാപിച്ച സ്ഥാനാർഥി പട്ടികയിൽ ഇടംനേടിയതിൽ അഭിമാനിക്കുന്നുവെന്നും അദ്ദേഹം പറഞ്ഞു.

പ്രഖ്യാപനം വന്നതിനുപിന്നാലെ, പിന്മാറുന്നതായി മണികണ്ഠൻ വ്യക്തമാക്കിയിരുന്നു. മണികണ്ഠ​െൻറ ഫേസ്ബുക്ക് പ്രൊഫൈൽ നെയിം ആയ മണിക്കുട്ടൻ എന്ന പേരാണ് ബി.ജെ.പി പട്ടികയിൽ ഉണ്ടായിരുന്നത്. ബി.ജെ.പി സ്ഥാനാർഥിയായി പരിഗണിക്കുന്നുണ്ടെന്നറിയിച്ച് ജില്ല^സംസ്ഥാന നേതാക്കൾ ബന്ധപ്പെട്ടിരുന്നു. സ്ഥാനാർഥിയാകാനില്ലെന്ന് അന്നുതന്നെ വ്യക്തമാക്കിയതാണ്. ബയോഡാറ്റ അയക്കാൻ പറഞ്ഞെങ്കിലും താൽപര്യമില്ലെന്ന് പറഞ്ഞ് പിന്മാറി. ഇതിനിടെ ഞായറാഴ്ച ഉച്ചക്ക് ടി.വിയിലൂടെയാണ്, ബി.ജെ.പി സ്ഥാനാർഥിയായി ത​െൻറ പേര് പ്രഖ്യാപിച്ച വിവരം അറിയുന്നത്.

പിന്നാലെ വീട്ടിലെത്തിയ നേതാക്കളോടും ഇതേ നിലപാട് തന്നെയാണ് സ്വീകരിച്ചത്. കാലങ്ങളായി ഇടതു^വലതു മുന്നണികൾ ആദിവാസികളിലെ ഏറ്റവും പിന്നാക്കമായ പണിയ വിഭാഗത്തെ അവഗണിക്കുകയാണ്. പണിയ വിഭാഗത്തിെൻറ ഉന്നമനവും പഠനവുമാണ് ത​െൻറ ലക്ഷ്യം. അടുത്ത അഞ്ചു വർഷത്തിനുള്ളിൽ പണിയ വിഭാഗത്തിൽനിന്ന് കുറഞ്ഞത് അഞ്ച് എം.ബി.എക്കാരെയെങ്കിലും ഉന്നത മാർക്കോടുകൂടി സൃഷ്​ടിച്ചെടുക്കാമെന്ന് വിശ്വാസമുണ്ടെന്നും ഈ വിഭാഗത്തിലെ ആദ്യ എം.ബി.എക്കാരനായ മണികണ്ഠൻ പറഞ്ഞു.

ഇതിനിടെ, ''ഈ കാണുന്ന വിളക്കു കാലിൽ തലകീഴായി എന്നെ കെട്ടിത്തൂക്കിയാലും ഞാനെെൻറ ജനതയെ ഒറ്റുകൊടുക്കില്ല'' എന്ന അംബേദ്കറിെൻറ വാക്കുകൾ ഫേസ്ബുക്കിൽ പോസ്​റ്റ് ചെയ്ത് അംബേദ്കർ രാഷ്​ട്രീയത്തോടുള്ള കൂറും വ്യക്തമാക്കി. പൂക്കോട് കേരള വെറ്ററിനറി ആൻഡ് അനിമല്‍സ് സയന്‍സ് യൂനിവേഴ്സിറ്റിയില്‍ വൈല്‍ഡ് ലൈഫ് ഡിപ്പാർട്​മെൻറില്‍ ഗോത്രമിഷൻ ടീച്ചിങ് അസിസ്​റ്റൻറാണ് മണികണ്ഠൻ.