മംഗളൂരു വിമാനദുരന്തത്തിന്​ എട്ടു വയസ്​; നഷ്​ടപരിഹാരത്തിലേക്ക്​ ഇനിയും എത്ര ദൂരം​?  

കാസർകോട്​: പ്രവാസികളുടെ മനസില്‍ അണയാത്ത കനലുകള്‍ കോരിയിട്ട മംഗലാപുരം വിമാനദുരന്തത്തിന് ഇന്ന് ഏട്ടാണ്ട്​. സന്തോഷത്തോടെ കളി ചിരികള്‍ പറഞ്ഞ് പെട്ടികെട്ടി നാട്ടിലേക്ക് യാത്രയാക്കിയവര്‍ ദുരന്തത്തിൽപ്പെട്ട വാര്‍ത്ത കേട്ട് ഞെട്ടി ഉണരുകയായിരുന്നു. ജീവനക്കാരടക്കം 166 പേരുമായി 2010 മെയ് 21ന് രാത്രി ദുബൈ അന്താരാഷ്​ട്ര വിമാനത്താവളത്തില്‍ നിന്ന് മംഗലാപുരത്തേക്ക് തിരിച്ച എയർ ഇന്ത്യ എക്സ്പ്രസ് 812 വിമാനം മംഗലാപുരം ബജ്പെ വിമാന താവളത്തില്‍ പുലര്‍ച്ചെ ഒരുമണിയോടെ ലാന്‍ഡിങിനൊരുങ്ങുന്നതിനിടെയായിരുന്നു അപകടം. ദുരന്തം നടന്ന് എട്ട്​ വര്‍ഷം പിന്നിട്ടിട്ടും മരിച്ചവരുടെ ആശ്രിതര്‍ക്കു ലഭിക്കേണ്ട അര്‍ഹമായ നഷ്​ട പരിഹാരമോ സര്‍ക്കാര്‍ വാഗ്ദാനം ചെയ്ത ജോലിയോ പലര്‍ക്കും ലഭിച്ചിട്ടില്ല.

കുടുംബനാഥരും മക്കളും നഷ്​ടപ്പെട്ട വീടുകളും അനാഥരായ മക്കളും ദുരന്തത്തി​​​​​​​​െൻറ ബാക്കിപത്രമാണിന്നും. 'എനിക്ക്​ ഭർത്താവിനെ തിരിച്ച്​ തന്നാൽ മതിയായിരുന്നു, നഷ്​ടപരിഹാരത്തിനായി ഒരുപാട്​ പ്രാവശ്യം കോടതി കയറിയിട്ടുണ്ട്​, കേസുകൾ നടന്നു കൊണ്ടിരിക്കുകയാണെന്നും ഉടൻ തന്നെ പരിഹാരം കാണുമെന്നാണ്​ അധികാരികൾ പറയുന്നത്​. വലിയ സ്വപ്​നത്തോടെയായിരുന്നു ഭർത്താവ്​ കടൽ കടന്ന്​ അറേബ്യയിലെത്തതിയത്​, ഇൗ മൂന്ന്​ മക്ക​െളയും കൊണ്ട്​ ഞാൻ എന്താണ്ചെയ്യുക, പൊട്ടിക്കരഞ്ഞ്​ കൊണ്ട്​ വിമാനപകടത്തിൽ മരിച്ച കീഴൂരിലെ ഉമേശ​​​​​െൻറ ഭാര്യ പ്രമീള പറഞ്ഞു.

സുപ്രീം കോടതിയുടെ അന്തിമ വിധി കാത്ത്​ നിൽക്കുന്ന ഒരാളുണ്ട്​ കുമ്പള ആരിക്കാടിയിൽ. ഹൈകോടതിയിൽ നിന്ന്​ ആദ്യം അനുകൂലമായ വിധി വന്നിരുന്നു. ഇതിനെതിരെ എയർ ഇന്ത്യ അപ്പീൽ നൽകുകയും അവർക്കനുകൂലമായി ഉത്തരവിറങ്ങിയതോട്​ കൂടിയാണ്​ സലാം സുപ്രീം കോടതിയിൽ ഹരജി നൽകിയത്​.    മരിച്ചവരുടെ ആശ്രിതർക്ക്​ ​മോൺഡ്രിയൽ കരാറടിസ്​ഥാനത്തിൽ നഷ്​ടപരിഹാരം നൽകണമെന്നാവശ്യപ്പെട്ടാണ്​ ഹരജി. സുപ്രീംകോടതിയിൽ ഹരജി നൽകിയിട്ട്​ ആറ്​ വർഷം തികയുകയാണ്​. ഇത്​ സംബന്ധിച്ച്​ ആഗസ്​റ്റ്​ മാസങ്ങൾക്കകം നടപടിയുണ്ടാകുമെന്നാണ്​ അധികൃതർ അറിയിച്ചതെന്ന്​ സലാം പറഞ്ഞു. ഇക്കാര്യത്തിൽ ഒരു ഉറപ്പുമില്ലെന്നും അദ്ദേഹം പറഞ്ഞു.

സലാമി​​​​​െൻറ മകൻമുഹമ്മദ്​ റാഫിയാണ്​ വിമാന അപകടത്തിൽ മരിച്ചത്​. നഷ്​ടപരിഹാരമായി 35 ലക്ഷം ഇവർക്ക്​ ലഭിച്ചിരുന്നു. അന്നത്തെ വ്യോമയാനമന്ത്രി പ്രഫുല്‍ പട്ടേല്‍ മോണ്‍ട്രിയാല്‍ ഉടമ്പടി പ്രകാരം കുറഞ്ഞത് 76 ലക്ഷം രൂപ വീതം മരിച്ചവരുടെ ആശ്രിതര്‍ക്ക് നല്‍കുമെന്ന് പ്രഖ്യാപിച്ചിരുന്നു. ആറുമാസത്തിനകം തുക നല്‍കുമെന്നായിരുന്നു അന്നത്തെ വാഗ്ദാനം. എന്നാല്‍ പലര്‍ക്കും പലവിധത്തിലാണ് നഷ്ടപരിഹാരം വിതരണം നടത്തിയത്. രാഷ്​ട്രീയ ഉദ്യോഗസ്​ഥ ചരടുവലികളും ഇതിലുണ്ടായിരുന്നുവെന്നും രക്ഷപ്പെട്ടവരും മരിച്ചവരുടെ ബന്ധുക്കളും പറയുന്നത്. അപകടത്തിൽ മരിച്ച 15ഓളം കുടുംബങ്ങള്‍ക്ക്​ പ്രിയപ്പെട്ടവരുടെ മൃതദേഹാവശിഷ്​ടം പോലും ലഭിച്ചില്ല. ദുരന്തത്തില്‍ 103 പുരുഷന്‍മാരും 32 സ്ത്രീകളും 23 കുട്ടികളുമാണ് മരിച്ചത്. ഇതില്‍ നാല് കൈകുഞ്ഞുങ്ങളും ഉണ്ടായിരുന്നു. മരിച്ചവരില്‍ 58 പേരും മലയാളികളായിരുന്നു. പലര്‍ക്കും പകുതി തുക കിട്ടാന്‍ വര്‍ഷങ്ങളോളം കോടതി കയറി ഇറങ്ങേണ്ടി വന്നു.