വീട്ടിനുള്ളിൽ കുഴിച്ചിട്ട നിലയിൽ കണ്ടെത്തിയ മൃതദേഹം തിരിച്ചറിഞ്ഞു

മാനന്തവാടി: നിർമാണത്തിലിരിക്കുന്ന വീട്ടിനുള്ളിൽ കുഴിച്ചിട്ട നിലയിൽ കണ്ടെത്തിയ മൃതദേഹം തിരിച്ചറിഞ്ഞു. തോണിച്ചാൽ പൈങ്ങാട്ടിരിയിൽ വാടകക്കു​ താമസിച്ചുവരുന്ന തമിഴ്‌നാട് ഉസിലാംപെട്ടി പരമ തേവരുടെ മകൻ ആശൈകണ്ണ​േൻറതാണ് (48) മൃതദേഹമെന്ന്​ ഭാര്യ മണിമേഖലയും മകൻ ജയപാണ്ഡി എന്ന വിഷ്ണുവുമാണ് തിരിച്ചറിഞ്ഞത്. വ്യാഴാഴ്ച വൈകിട്ട്​ മാനന്തവാടി ഡിവൈ.എസ്.പി കെ.എം. ദേവസ്യ, പൊലീസ് ഇൻസ്പെക്ടർ പി.കെ. മണി എന്നിവരുടെ സാന്നിധ്യത്തിൽ​ വസ്ത്രങ്ങളും ശരീരത്തിലെ അടയാളങ്ങളും നോക്കിയാണ്​ മൃതദേഹം ഭാര്യയും മകനും തിരിച്ചറിഞ്ഞത്. 

പൈങ്ങാട്ടിരി വില്ലേജ് ഓഫിസിനു സമീപം സ്വകാര്യ വ്യക്തിയുടെ നിർമാണത്തിലുള്ള വീടി​​െൻറ മുറിയിൽ കുഴിച്ചിട്ട നിലയിലാണ് ബുധനാഴ്ച ഉച്ചയോടെ മൃതദേഹം കണ്ടെത്തിയത്. വ്യഴാഴ്ച ഉച്ചയോടെ മാനന്തവാടി തഹസിൽദാർ എൻ.ഐ. ഷാജുവി​​െൻറ നേതൃത്വത്തിൽ ഇൻക്വസ്​റ്റ്​ നടത്തി. തുടർന്ന്, കോഴിക്കോട് മെഡിക്കല്‍ കോളജ് ഫോറന്‍സിക് അസോസിയേറ്റ് പ്രഫസർ ഡോ. സുജിത്ത് ശ്രീനിവാസി​​െൻറ നേതൃത്വത്തില്‍ മൃതദേഹം പ്രാഥമിക പരിശോധന നടത്തി പോസ്​റ്റുമോര്‍ട്ടത്തിനായി കോഴിക്കോട് മെഡിക്കല്‍ കോളജിലേക്ക് മാറ്റി. 

തമിഴ്‌നാട്ടില്‍നിന്ന്​ ആറുവര്‍ഷം മുമ്പ് തോണിച്ചാലിലെത്തി വിവിധയിടങ്ങളിൽ വാടകക്ക്​ താമസിക്കുകയായിരുന്നു ആശൈകണ്ണൻ. ഭാര്യക്കും മൂന്ന് മക്കൾക്കുമൊപ്പം കഴിഞ്ഞ രണ്ടരവര്‍ഷമായി പൈങ്ങാട്ടിരിയിലെ സുലൈമാന്‍ ക്വാര്‍ട്ടേഴ്‌സിലാണ് താമസിക്കുന്നത്. ഭാര്യയും മക്കളുമായി അകന്നു കഴിഞ്ഞിരുന്ന ഇയാൾ ഇടക്കുമാത്രമാണ് കുടുംബത്തോടൊപ്പം കഴിഞ്ഞിരുന്നത്​. കഴിഞ്ഞ ഒരു മാസത്തിലേറെയായി ഇയാളെ കാണാനില്ലായിരുന്നു. സംഭവം കൊലപാതകമാണെന്ന് വ്യക്തമായിട്ടുണ്ടെങ്കിലും പോസ്​റ്റുമോര്‍ട്ടം റിപ്പോര്‍ട്ട് പൂര്‍ണമായും പുറത്തുവന്നാ​േല ഔദ്യോഗികമായി സ്ഥിരീകരിക്കാനാവൂവെന്ന് ​െപാലീസ് വ്യക്തമാക്കി. അതേസമയം, സംഭവവുമായി ബന്ധപ്പെട്ട് ആശൈകണ്ണ​​െൻറ മകനടക്കം നാലുപേർ പൊലീസ് കസ്​റ്റഡിയിലാണെന്ന് സൂചനയുണ്ട്. മൃതദേഹം ഏകദേശം ഒരുമീറ്ററോളം ആഴത്തിലാണ് കാണപ്പെട്ടത്. വളരെ കൃത്യമായി തയാറാക്കിയ കുഴിയിലാണ് മൃതദേഹം മൂടിയിരുന്നത്. 

തുണികൊണ്ട്​ മൂടപ്പെട്ട നിലയില്‍ ദേഹത്ത് ചെങ്കല്ലുകള്‍ കയറ്റിവെച്ച നിലയിലായിരുന്നു. കുഴിക്കുള്ളില്‍നിന്ന്​ ഒരു പൈപ്പി​​െൻറ കഷണവും മദ്യക്കുപ്പിയും കണ്ടെത്തിയിരുന്നു. വയനാടി​​െൻറ ചുമതല വഹിക്കുന്ന കോഴിക്കോട് സയൻറിഫിക് ഓഫിസര്‍ വി. വിനീത്, വിരലടയാള വിദഗ്ധരായ കെ.വി. സുനീഷ്, നിയാദ്, സുരേഷ്, സൂരജ് കുമാര്‍, ​െഡപ്യൂട്ടി തഹസില്‍ദാര്‍ എം.ജെ. അഗസ്​റ്റിന്‍, നല്ലൂര്‍നാട് വില്ലേജ് ഓഫിസര്‍ കെ.എസ്. ജയരാജ്, കല്‍പറ്റ എ.എസ്.പി ചൈത്ര തെരേസ ജോണ്‍, വിവിധ സ്​റ്റേഷനുകളിലെ എസ്‌.ഐമാര്‍, അഡി. എസ്‌.ഐമാര്‍, ജുനിയര്‍ എസ്‌.ഐമാര്‍ തുടങ്ങിയവരുടെ സാന്നിധ്യത്തിലായിരുന്നു മൃതദേഹം പരിശോധിച്ചത്. മറ്റു മക്കൾ: സുന്ദര പാണ്ഡി, അരുൺ പാണ്ഡി.