ശാരീരിക ​വെല്ലുവിളി നേരിടുന്ന പെൺകുട്ടി​യെ ബലാത്സംഗം ചെയ്ത പ്രതിക്ക്​ മരണംവരെ തടവുശിക്ഷ

ചെറുതോണി (ഇടുക്കി): ശാരീരിക ​വെല്ലുവിളി നേരിടുന്ന പെൺകുട്ടി​യെ ബലാത്സംഗം ചെയ്യുകയും കല്ലിന്​ ഇടിച്ച്​ പരിക്കേൽപിക്കുകയും ചെയ്ത കേസിൽ പ്രതിക്ക്​ മരണംവരെ തടവുശിക്ഷ. വട്ടവട ഗ്രാമപഞ്ചായത്ത്‌ പഴത്തോട്ടം കോവിലൂർ സ്വദേശി കുരുവി എന്ന അന്തോണിയെയാണ് (32) പൈനാവ് അതിവേഗ കോടതി ജഡ്ജി ലൈജുമോൾ ഷെരീഫ് രണ്ട് ജീവപര്യന്തം തടവിനും 3.11 ലക്ഷം രൂപ പിഴയടക്കാനും ശിക്ഷിച്ചത്​. പ്രതി മരണംവരെ ജയിലിൽ കഴിയണമെന്നും കോടതി പ്രത്യേകം വ്യക്തമാക്കി.

2021 ആഗസ്റ്റ്‌ നാലിനാണ് സംഭവം. പെൺകുട്ടിയെ വീടിന്‍റെ പരിസരത്തെ തേയിലത്തോട്ടത്തിലേക്ക് വലിച്ചിഴച്ച്​ കൊണ്ടുപോയി ബലാത്സംഗം ചെയ്യുകയായിരുന്നു. കുട്ടി ഒച്ച​വെച്ച്​ പ്രതിരോധിച്ചപ്പോൾ കല്ലുകൊണ്ട് മുഖത്തടിച്ച് പരിക്കേൽപിച്ചു. 29 സാക്ഷികളെയും 35 രേഖകളും പ്രോസിക്യൂഷൻ കോടതിയിൽ ഹാജരാക്കി. കുട്ടിയുടെ ആംഗ്യഭാഷയിലുള്ള മൊഴി വിഡിയോയിൽ പകർത്തി ഹാജരാക്കിയിരുന്നു. കോടതിയിലെ വിചാരണ നടപടികളും വിഡിയോയിൽ പകർത്തി.

പിഴത്തുക പെൺകുട്ടിക്ക്​ നൽകണം. കുട്ടിക്ക് മതിയായ നഷ്ടപരിഹാരം നൽകാൻ ജില്ല ലീഗൽ സർവിസ് അതോറിറ്റിയോടും നിർദേശിച്ചു. 2021ൽ ദേവികുളം പൊലീസ് രജിസ്റ്റർ ചെയ്ത്​ അന്തിമ റിപ്പോർട്ട്‌ ഫയൽ ചെയ്ത കേസിൽ ​പ്രോസിക്യൂഷനുവേണ്ടി സ്‌പെഷൽ പബ്ലിക്‌ പ്രോസിക്യൂട്ടർ അഡ്വ. ഷിജോമോൻ ജോസഫ് കണ്ടത്തിങ്കരയിൽ ഹാജരായി.