കായംകുളത്ത്​ യുവാവിനെ അക്രമിസംഘം കാറിടിച്ച്​ കൊന്നു

കായംകുളം: ബാറിലുണ്ടായ തർക്കത്തെ തുടർന്ന്​ കായംകുളത്ത്​ യുവാവിനെ ഒരു സംഘമാളുകൾ കാറിടിച്ച്​ കൊന്നു. കരീലക്കു ളങ്ങര കരുവറ്റംകുഴി പുത്തൻപുരക്കൽ ഷമീർഖാൻ(25) എന്നയാളാണ്​ കൊല്ലപ്പെട്ടത്​. ചൊവ്വാഴ്​ച രാത്രി 12 മണിയോടെ ഹൈവേ പാലസ്​ ബാറിന്​ സമീപത്താണ്​ സംഭവമുണ്ടായത്​.

മദ്യപിക്കാനായി ഷമീർ ഖാന​ും സംഘവ​ുമെത്തിയപ്പോ​േഴക്ക്​ ബാറിൻെറ പ്രവർത്തന സമയം കഴിഞ്ഞിരുന്നു. അതിനാൽ ബാർ ജീവനക്കാർ ഗേറ്റ്​ അടച്ചു. എന്നാൽ തങ്ങളെ കൂടി മദ്യപിക്കാൻ അനുവദിക്കണമെന്ന്​ ആവശ്യപ്പെട്ട്​ സംഘം തർക്കത്തിലേർപ്പെട്ടു. ഈ സമയം ബാറിൽ നിന്ന്​ മദ്യപിച്ചിറങ്ങിയ ഒരു സംഘം തർക്കത്തിൽ ഇടപെടുകയും രംഗം വഷളാവുകയുമായിരുന്നു.

ഇരു സംഘങ്ങളും തമ്മിൽ വാക്കേറ്റവും കൈയാങ്കളിയുമ​ുണ്ടായി. ഇതിനിടെ മദ്യപ സംഘത്തിലുള്ള ഒരാൾ ബിയർ ​കുപ്പി കൊണ്ട് ഷമീർഖാനെ​ തലക്കടിച്ചു വീഴ്​ത്തി. തുടർന്ന്​ ഷമീർ ഖാൻ, സംഘവു​മായി വീണ്ടും സംഘർഷത്തിലായി. ബാറിന് മുന്നിലുണ്ടായ അടിപിടിക്ക് ശേഷം ബൈക്കിൽ വീട്ടിലേക്ക് പോവുകയായിരുന്ന ഷമീർഖാനെ കാറിലെത്തിയ സംഘം ഇടിച്ചുവീഴ്ത്തുകയും തുടർന്ന് തലയിലൂടെ കാർ കയറ്റി കൊലപ്പെടുത്തുകയായിരുന്നു.

സംഭവത്തിൽ അന്വേഷണം ഉൗർജ്ജിതമാക്കിയ പൊലീസ്​ പ്രതികൾ സഞ്ചരിച്ച സ്വിഫ്​റ്റ്​ കാർ കിളിമാനൂരിൽ വെച്ച്​ കസ്​റ്റഡിയിലെടുത്തു. അടൂർ സ്വദേശിയുടെ ഉടമസ്ഥതയിലുള്ള കാർ വാടകക്കെടുത്താണ്​ അക്രമി സംഘം ബാറിലെത്തിയത്​. കായംകുളം മാർക്കറ്റിലുള്ള മൂന്നംഗസംഘമാണ് കൊലപാതകത്തിന് പിന്നിലെന്ന് പൊലീസ് പറഞ്ഞു. അടുത്തിടെ ഗൾഫിൽ നിന്നെത്തിയ ഷമീർഖാൻെറ വിവാഹം അടുത്ത മാസം നടത്താൻ ചൊവ്വാഴ്ച ധാരണയായിരുന്നു. കൂട്ടുമാരുമൊത്ത് ഇതിൻെറ ആഘോഷം കരീലക്കുളങ്ങരയിൽ നടത്തിയ ശേഷമാണ് വീണ്ടും ബാറിലേക്ക് എത്തിയതെന്നാണ് അറിയുന്നത്. ആലപ്പു​ഴയിൽ നിന്ന്​ ഫോറൻസിക്​ സംഘവും വിരലടയാള വിദഗ്​ധരും സംഭവസ്ഥലത്തെത്തി പരിശോധന നടത്തിയിട്ടുണ്ട്​.