മതിയായ ചികിത്സ കിട്ടിയില്ല; മുംബൈയിൽ മലയാളി സാമൂഹിക പ്രവർത്തകൻ മരിച്ചു

മുംബൈ: നഗരത്തിലെ അറിയപ്പെടുന്ന മലയാളി സാമൂഹിക പ്രവർത്തകൻ ഖാലിദ്​ മംബ്രാണ എന്ന കെ.എസ്​ ഖാലിദ്​ സമയത്ത്​ ചികിത്സ ലഭിക്കാതെ മരിച്ചു. ഡോംഗ്രിയിലെ താനബന്ധർ ബാഗിൽ താമസിക്കുന്ന ഖാലിദ്​ കാസർകോട്​ മംബ്രാണ സ്വദേശിയാണ്​. നഗരത്തിലെ ഹോട്ടൽ വ്യവസായിയുമാണ്​. 

രണ്ട്​ ദിവസമായി പനിക്ക്​ ചികിത്​സയിലായിരുന്ന ഇദ്ദേഹത്തിന്​ വെള്ളിയാഴ്​ച രാത്രി ഏഴോടെ ശ്വാസ തടസം അനുഭവപ്പെടുകയായിരുന്നു. തടർന്ന്​ നഗരത്തിലെ അറിയപ്പെടുന്ന സെയ്​ഫി, പ്രിൻസ്​ അലി ഖാൻ, ബോംബെ, ലീലാവതി, മസീന ആശുപത്രകളിൽ ചികിത്സക്കായി ശ്രമിച്ചെങ്കിലും തീവ്ര പരിചരണ വിഭാഗത്തിൽ ഒഴിവില്ലാത്തതും ഒാക്​സിജൻ സിലണ്ടർ ലഭ്യമല്ലാത്തതും ചൂണ്ടിക്കാട്ടി പ്രവേശനം നൽകിയില്ല. ഒടുവിൽ രാത്രി പത്തോടെ സ​െൻറ്​ ജോർജ്​ ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല. 

നഗരത്തിലെ മെഡിക്കൽ കോളജുകളിൽ ഒന്നായ സ​െൻറ്​ ജോർജിലെ അധികൃതരും ഒാക്​സിജൻ സിലണ്ടർ സംഘടിപ്പിക്കാൻ രോഗിക്ക്​ ഒപ്പമുള്ളവരോട്​ ആവശ്യപ്പെട്ട സാഹചര്യമാണുണ്ടായത്​. ശനിയാഴ്​ച പുലർച്ചെ മൂന്ന്​ മണിയോടെ മരണം സംഭവിച്ചു. കോവിഡ്​ പരിശോധനക്കായി സൂക്ഷിച്ച മൃതദേഹം ഇതുവരെ വിട്ടു നൽകിയിട്ടില്ല. ശനിയാഴ്​ച വൈകീട്ട്​ അഞ്ചോടെ പരിശോധന ഫലം പ്രതീക്ഷിക്കുന്നു. 

ബോംബെ കേരള മുസ്​ലിം ജമാഅത്ത്​ നിർവാഹക സമിതി അംഗവും അവരുടെ മയ്യത്ത്​ പരിപാല സമിതി അധ്യക്ഷനുമായ ഖാലിദ്​ സാമൂഹിക പ്രവർത്തന രംഗത്തെ നിറ സാന്നിധ്യമാണ്​. കോവിഡ്​ പശ്​ചാത്തലത്തിൽ രാജ്യത്തിന്‍റെ സാമ്പത്തിക തലസ്​ഥാനമായ മുംബൈയിൽ ആരോഗ്യ സുരക്ഷയില്ലെന്ന്​ ബോംബെ കേരള മുസ്​ലിം ജമാഅത്ത്​ പ്രസിഡൻറ്​ സി.എച്ച്​ അബ്​ദുറഹിമാൻ പറഞ്ഞു. സമയത്ത്​ ചികിത്സ ലഭിക്കാതെ മരിക്കുന്ന രണ്ടാമത്തെ മലയാളിയാണ്​ ഖാലിദ്​. മുംബൈ സ്വദേശിയാണ്​ ഭാര്യ.