കിണറ്റിൽ വീണയാളെ അയൽവാസി താങ്ങി നിർത്തി; അഗ്​നിരക്ഷസേന രക്ഷിച്ചു

തിരുവല്ല: വെള്ളം കോരുന്നതിനിടെ കാൽവഴുതി കിണറ്റിൽ വീണ മധ്യവയസ്കനെ സമീപവാസിയും അഗ്​നിരക്ഷസേനയും ചേർന്ന്​ രക്ഷിച്ചു. തീപ്പിനി കരിമ്പനക്കൽ ജോസഫ് ഫിലിപ്പോസി (46) നെയാണ് രക്ഷപ്പെടുത്തിയത്. സാരമായി പരിക്കേറ്റ ജോസഫിനെ താലൂക്ക് ആശുപത്രിയിൽ പ്രവേശിപ്പിച്ചു.

ശനിയാഴ്​ച രാവിലെ 11 ഒാടെയായിരുന്നു സംഭവം. വെള്ളം കോരുന്നതിനിടെ നാൽപതടിയോളം ആഴമുള്ള കിണറ്റിലേക്ക് വീഴുകയായിരുന്നു. ജോസഫി​​െൻറ മാതാപിതാക്കളുടെ നിലവിളികേട്ട് ഓടിയെത്തിയ സമീപവാസിയായ യുവാവ് കിണറ്റിലിറങ്ങി മോട്ടോറി​​െൻറ പൈപ്പിൽ ഇയാളെ താങ്ങിനിർത്തി. തുടർന്ന് സ്ഥലത്തെത്തിയ അഗ്​നിരക്ഷസേന സംഘം അബോധാവസ്ഥയിലായിരുന്ന ജോസഫിനെ വല ഉപയോഗിച്ച് കിണറിനു​ പുറത്തെത്തിക്കുകയായിരുന്നു.

സ്​റ്റേഷൻ ഓഫിസർ പി.ബി. വേണുക്കുട്ടൻ, അഡീഷനൽ സ്​റ്റേഷൻ ഓഫിസർ പോൾസൺ ജോസഫ്, ലീഡിങ്​ ഫയർമാൻ കലാനാഥൻ, ഫയർമാന്മാരായ ശ്രീനിവാസൻ, ശ്രീകാന്ത്, അനു ആർ. നായർ, റെജി ജോസ്, വിനീത്, ഉണ്ണികൃഷ്ണൻ എന്നിവർ രക്ഷാപ്രവർത്തനത്തിന് നേതൃത്വം നൽകി.