കോഴിക്കോട് ബസിൽ ലൈംഗികാതിക്രമം കാണിച്ചുവെന്ന് ആരോപിച്ച് യുവതി വിഡിയോ ഇട്ടതിനു പിന്നാലെ യുവാവ് ജീവനൊടുക്കി

കോഴിക്കോട്: ബസിൽ ലൈംഗികാതിക്രമം കാണിച്ചുവെന്നാരോപിച്ച് യുവതി സോഷ്യൽമീഡിയയിൽ വിഡിയോ പങ്കു വെച്ചതിനു പിന്നാലെ യുവാവ് ജീവനൊടുക്കി. കോഴിക്കോട് ഗോവിന്ദപുരം സ്വദേശി ദീപക്കാണ് മരിച്ചത്. ബസിൽ വെച്ച് എടുത്ത വിഡിയോ വൈറലാവുകയും വലിയ രീതിയിൽ വാദ പ്രതിവാദങ്ങൾ ഉണ്ടാവുകയും ചെയ്തിരുന്നു. കടുത്ത മാനസിക സമ്മർദ്ദത്തിലായിരുന്ന യുവാവ് ഇന്നലെ രാത്രിയോടെ ആത്മഹത്യ ചെയ്യുകയായിരുന്നു.

എന്നാൽ ദീപക്ക് സ്ത്രീയോട് അപമര്യാദയായി പെരുമാറിയിട്ടില്ലെന്നും വളച്ചൊടിച്ചതാണെന്നുമാണ് ബന്ധുക്കളുടെ ആരോപണം. കോഴിക്കോട് മെഡിക്കൽ കോളേജ് പൊലീസ് അസ്വാഭാവിക മരണത്തിന് കേസെടുത്തു.

ലൈംഗികാതിക്രമം താൻ വടകര പൊലീസിൽ അറിയിച്ചിരുന്നുവെന്ന് യുവതി പറഞ്ഞിരുന്നുവെങ്കിലും അത്തരത്തിലൊരു പരാതി ലഭിച്ചിട്ടില്ല എന്നാണ് പൊലീസിൽ നിന്ന് ലഭിക്കുന്ന വിവരം. യുവതിക്കെതിരെ കേസെടുക്കണമെന്നാണ് കുടുംബത്തിന്‍റെ ആവശ്യം.