പക്ഷാഘാതം ബാധിച്ച മാതാവിന്‍റെ മരണം കൊലപാതകമെന്ന് തെളിഞ്ഞു; മകൻ റിമാൻഡിൽ

കൊട്ടാരക്കര: പക്ഷാഘാതം ബാധിച്ച മാതാവ്​ ദുരൂഹ സാഹചര്യത്തിൽ മരിച്ച സംഭവം കൊലപാതകമെന്ന്​ തെളിഞ്ഞു. മകൻ അറസ്റ്റിലായി. പവിത്രേശ്വരം ചെറുപൊയ്ക കോരായ്ക്കോട് സതീഷ് ഭവനത്തിൽ പത്മിനിയമ്മ (61) ആണ്​ വെള്ളിയാഴ്ച രാത്രി മരിച്ചത്​. ഈ കേസിൽ മകൻ സ​തീഷി​ (37) നെ പൊലീസ്​ അറസ്റ്റ് ചെയ്തു.

പൊലീസ്​ പറയുന്നതിങ്ങനെ: മദ്യപിച്ചുവന്ന്​ മാതാപിതാക്കളെ ഉപദ്രവിക്കുന്ന സ്വഭാവക്കാരനായിരുന്നു സതീഷ്​. ഗൾഫിലായിരുന്ന ഇയാൾ കഴിഞ്ഞവർഷം നവംബറിലാണ് നാട്ടിൽ വന്നത്. ഗൾഫിൽ നിൽക്കെ ഇയാൾ സമ്പാദിച്ച സ്വർണവും പണവും അമ്മയെ ഏൽപ്പിച്ചിരുന്നു. ഇത് ഇയാൾ തിരികെ ചോദിച്ചു. നാട്ടിൽ വന്നപ്പോൾ അമ്മയുടെ കൈവശം ഇത്​ ഉണ്ടായിരുന്നില്ല. തുടർന്ന് സാമ്പത്തിക പ്രയാസത്തിലായ സതീഷ്​ ലോറി ഡ്രൈവറായി ജോലി ചെയ്യുകയായിരുന്നു.

ഇതിനിടയിൽ ജനുവരിയിൽ വിവാഹിതനായി. പത്മിനി അമ്മയും മരുമകളും തമ്മിലുള്ള തർക്കം മൂലം ഒരാഴ്ച മുമ്പ്​ മരുമകൾ സതീഷുമായി പിണങ്ങി സ്വന്തം വീട്ടിലേക്ക് പോയിരുന്നു. സതീഷിന്‍റെ നിരന്തര ഉപദ്രവം മൂലം കഴിഞ്ഞ ഏഴിന്​ പിതാവ്​ ശശിധരൻപിള്ള നാടുവിട്ടുപോയിരുന്നു.

വെള്ളിയാഴ്ച രാത്രി മാതാവുമായി തർക്കമുണ്ടായി. തുടർന്ന് കട്ടിലിൽ കിടക്കുകയായിരുന്ന പത്മിനിയമ്മയെ മദ്യലഹരിയിലായിരുന്ന പ്രതി ക്രൂരമായി മർദിച്ചു. കട്ടിലിൽനിന്ന്​ പിടിച്ചു തറയിലിട്ട് തല തറയിൽ ഇടിക്കുകയും വാരിയെല്ലിന് ചവിട്ടുകയുമായിരുന്നു. ഗുരുതരമായി പരിക്കേറ്റ്​ മരണം സംഭവിക്കുകയായിരുന്നു. മരണത്തിൽ സംശയം തോന്നി നടത്തിയ അന്വേഷണത്തിൽ പ്രതി കിടന്ന കട്ടിലിലെ ഷീറ്റിലും ധരിച്ചിരുന്ന ഷർട്ടിലും ശരീരത്തും ചെരിപ്പിലും രക്തക്കറ കണ്ടെത്തിയിരുന്നു.

ശാസ്​താംകോട്ട ഡിവൈ.എസ്​.പി എസ്​. ഷെരീഫിന്‍റെ നേതൃത്വത്തിൽ പുത്തൂർ സി.ഐ സുഭാഷ് കുമാർ, എസ്​.ഐമാരായ ജയേഷ്, രമേശൻ, എ.എസ്​.ഐ സന്തോഷ്, എസ്​.സി.പി.ഒമാരായ സജു എന്നിവരടങ്ങിയ സംഘമാണ്​ അറസ്റ്റ്​ ചെയ്തത്​.