ഷമീർ നാട്ടിൽ വന്നുപോയത് 20 ദിവസം മുമ്പ്; സൗദിയിൽ കൊല്ലപ്പെട്ട വിവരമറിഞ്ഞ് ഞെട്ടൽ മാറാതെ നാട്ടുകാർ

മൂവാറ്റുപുഴ: 20 ദിവസം മുമ്പ് നാട്ടിൽവന്ന് തിരിച്ചുപോയ മൂവാറ്റുപുഴ കാലാമ്പൂർ ഇലഞ്ഞായിൽ അലിയാരിന്‍റെ മകൻ ഷമീർ​ (48) കൊല്ലപ്പെട്ട വിവരം അറിഞ്ഞ് ഞെട്ടൽ മാറാതെ നാട്ടുകാർ. സൗദി റിയാദിലെ ഷുമൈസിയിൽ താമസസ്ഥലത്താണ് കൊല്ലപ്പെട്ട നിലയിൽ കണ്ടെത്തിയത്. ഞായറാഴ്ച വൈകീട്ട്​ മുത​ൽ​ ഇദ്ദേഹത്തെ കുറിച്ച്​ വിവരമില്ലായിരുന്നു. ഫോണിൽ വിളിച്ചിട്ടും കിട്ടാതിരുന്നതിനെ തുടർന്ന്​ സുഹൃത്തുക്കള്‍ തിങ്കളാഴ്​ച വൈകീട്ട്​ ഇദ്ദേഹം താമസിച്ചിരുന്ന റൂമിൽ പോയി നോക്കിയപ്പോഴാണ്​ മരിച്ചുകിടക്കുന്നതായി കണ്ടത്​.

ഇദ്ദേഹത്തിന്‍റെ വാഹനവും ഫോണും ലാപ്ടോപ്പും പണവും നഷ്ടമായിട്ടുണ്ട്. മോഷ്ടാക്കളുടെ ആക്രമണമാണെന്നാണ് സംശയം. ഫോൺ സ്വിച്ച്ഓഫായിരുന്നു. നാട്ടിൽനിന്നടക്കം വിളിച്ചിട്ടും ആളെ കിട്ടാതായതോടെ പൊലീസിൽ പരാതിപ്പെടുകയായിരുന്നു. ഇദ്ദേഹത്തി​െൻറ പേരിൽ ശുമൈസിയിൽ രണ്ടിടത്ത്​ ഫ്ലാറ്റുകളുണ്ട്​. അതിലൊന്നിലാണ്​ മൃതദേഹം കണ്ടെത്തിയത്​. പൊലീസ്​ എത്തി മൃതദേഹം ശുമൈസി ആശുപത്രി മോർച്ചറിയി​േലക്ക്​ മാറ്റി. ആരാണ്​ അക്രമിച്ചതെന്നതിനെ സംബന്ധിച്ച്​ ഒന്നും അറിവായിട്ടില്ല. പൊലീസ്​ കേസെടുത്ത്​ അന്വേഷണം നടത്തുകയാണ്​. പോസ്​റ്റുമോർട്ടം ഇന്ന് നടക്കുമെന്നാണ് വിവരം.

14 വർഷമായി റിയാദിലെ ഷുമൈസിൽ വിവിധ ബിസിനസ് സംരംഭങ്ങൾ നടത്തുകയായിരുന്നു ഷമീർ​. അതോടൊപ്പം കെ.എം.സി.സി പ്രവർത്തനങ്ങളിലും സജീവമായിരുന്നു. കെ.എം.സി.സി എറണാകുളം ജില്ല വൈസ് പ്രസിഡന്‍റായിരുന്നു. ഭാര്യ സൗദിയിലെ ആശുപത്രിയിൽ നഴ്സാണ്. മൂന്നു കുട്ടികളുണ്ട്.