ഉ‍ഡുപ്പി കൃഷ്ണമഠത്തിലെ കരകൗശലവിദഗ്​ധർ തീർത്ത ചന്ദനപരിമളം ഇനി മാർപാപ്പയുടെ കരങ്ങളിൽ

കോട്ടയം: ആ​ഗോള കത്തോലിക്ക സഭയുടെ അധ്യക്ഷനായി തെരഞ്ഞെടുക്കപ്പെട്ട പോപ്പ് ലിയോ പതിനാലാമൻ മാർപാപ്പക്ക്​ ‌വിശിഷ്ടമായ സമ്മാനവുമായി മലങ്കര ഓർത്തഡോക്സ് സുറിയാനി സഭ.

ഉ‍ഡുപ്പി കൃഷ്ണമഠത്തിലെ കരകൗശലവിദഗ്​ധർ ചന്ദനത്തടിയിൽ തീർത്ത സ്ലീബായാണ് സഭ ഉപഹാരമായി മാർപാപ്പക്ക്​ സമ്മാനിച്ചത്. പൂർണമായും കൈകൾകൊണ്ട് നിർമിച്ച സ്ലീബായിൽ അമൂല്യമായ കല്ലുകളും പതിപ്പിച്ചിട്ടുണ്ട്. മലങ്കര ഓർത്തഡോക്സ് സഭാധ്യക്ഷൻ ബസേലിയോസ് മാർത്തോമ മാത്യൂസ് തൃതീയൻ കാതോലിക്ക ബാവയെ പ്രതിനിധീകരിച്ച് സഭയുടെ ഇന്റർചർച്ച് എക്യുമെനിക്കൽ വിഭാ​ഗമാണ് ഉപഹാരം കൈമാറിയത്.

മലങ്കര ഓർത്തഡോക്സ് സഭയെ മാർപാപ്പയുടെ സ്ഥാനാരോഹണച്ചടങ്ങിലേക്ക് ക്ഷണിച്ചിരുന്നു. മെത്രാപ്പോലീത്തമാരായ സഖറിയ മാർ നിക്കോളവോസ്, എബ്രഹാം മാർ സ്തേഫാനോസ്, ഫാ. അശ്വിൻ ഫെർണാണ്ടസ് എന്നിവർ സ്ഥാനാരോഹണച്ചടങ്ങിൽ പങ്കെടുത്തശേഷം മാർപാപ്പയുമായി കൂടിക്കാഴ്ച നടത്തി.

കാതോലിക്ക ബാവയുടെ സന്ദേശം പ്രതിനിധിസംഘം മാർപാപ്പക്ക്​ കൈമാറി. ലോകസമാധാനത്തിനും ക്രൈസ്തവസഭകളുടെ ഏകീകരണത്തിനും നിർണായക പങ്കുവഹിക്കാൻ പാപ്പക്ക്​ കഴിയട്ടെയെന്ന് കാതോലിക്ക ബാവ ആശംസിച്ചു. മലങ്കര ഓർത്തഡോക്സ് സഭയും കത്തോലിക്ക സഭയും തുടർന്നുവരുന്ന വേദശാസ്ത്ര സംവാദങ്ങളും പരസ്പര സ​ഹകരണവും പുതിയ തലത്തിലേക്ക് വളരട്ടെയെന്നും അദ്ദേഹം കൂട്ടിച്ചേർത്തു.