മലബാർ സമരം: സി.പി.ഐ സംസ്കാരിക വിഭാഗത്തിൽ അഭിപ്രായഭിന്നത

തൃശൂർ: മലബാർ സമരവുമായി ബന്ധപ്പെട്ട്​ സി.പി.ഐ സംസ്കാരിക വിഭാഗമായ യുവകലാസാഹിതി നേതാക്കളുടെ പ്രതികരണം വിവാദത്തിൽ. ഇതിനെതിരെ സാംസ്കാരിക പ്രവർത്തകർ രംഗത്തെത്തി. മലബാർ പോരാട്ടം ഹിന്ദുവിരുദ്ധമെന്ന അഭിപ്രായം സി.പി.ഐയുടേതാണോ എന്ന് വ്യക്തമാക്കാൻ നിരൂപകൻ ബാലചന്ദ്രൻ വടക്കേടത്ത് ആവശ്യപ്പെട്ടു.

യുവകലാസാഹിതി സംസ്ഥാന പ്രസിഡൻറ്​ ആലങ്കോട് ലീലാകൃഷ്ണനും സെക്രട്ടറി എ.പി. അഹമ്മദും നടത്തിയ വിരുദ്ധ പ്രസ്താവനകളാണ് വിവാദമായത്. കോൺഗ്രസ് അഹിംസാ സമരത്തോട് ഖിലാഫത്ത് സമരത്തെ കൂട്ടിച്ചേർത്തത് അബദ്ധമായിരുന്നുവെന്നും കലാപകാരികളുടെ മനസ്സിൽ തുർക്കി മോഡൽ ഖിലാഫത്ത് മലബാറിൽ സ്ഥാപിക്കാനുള്ള പോരാട്ടമായിരുന്നുവെന്നുമാണ് എ.പി. അഹമ്മദ് പറഞ്ഞത്​. എന്നാൽ, വാരിയൻകുന്നത്ത്​ കുഞ്ഞഹമ്മദ്​ ഹാജി ഹിന്ദു വിരുദ്ധമായി ഒന്നും ചെയ്​തിട്ടില്ലെന്നും 1857ലെ സ്വാതന്ത്ര്യ സമര ശേഷമുണ്ടായ ഏറ്റവും വലിയ പോരാട്ടമാണ്​ മലബാറിലേതെന്നുമായിരുന്നു​ ആല​ങ്കോടി​​െൻറ നിലപാട്​. പഞ്ചാബ് ലഹളയോടും ചൗരിചൗര ലഹളയോടും കാണിച്ച സമീപനമല്ല കോൺഗ്രസ് മലബാർ സമരത്തോട്​ കാണിച്ചതെന്നും അദ്ദേഹം അഭിപ്രായപ്പെട്ടു.

ഈ രണ്ട് പ്രസ്താവനകളും ചരിത്രപരമായി സത്യസന്ധമല്ലെന്ന്​ ബാലചന്ദ്രൻ വടക്കേടത്ത് പറയുന്നു. പല രീതികളിലും പലയിടങ്ങളിലായി നടന്ന സമരങ്ങളെ യോജിപ്പിക്കാൻ കോൺഗ്രസ് നടത്തിയ പരിശ്രമമാണ് സ്വാതന്ത്ര്യ സമരത്തെ വിജയത്തിലെത്തിച്ചത്​. മലബാർ സമരം സ്വാതന്ത്ര്യ സമരത്തി​​െൻറ ഭാഗം തന്നെയാണ്. അതിൽ ഹിന്ദു-മുസ്​ലിം ദ്വന്ദം കാണുന്നവർ ഹിന്ദുവർഗീയതയോട് ചേർന്നുനിൽക്കാൻ ആഗ്രഹിക്കുന്നവരാണ്. ബ്രിട്ടീഷുകാരോട് ചേർന്നുനിന്ന ഹിന്ദുക്കൾ അന്ന് കൊല്ലപ്പെട്ടിട്ടുണ്ടാവാം. വാരിയൻകുന്നത്ത് നടത്തിയ ഏറ്റുമുട്ടലിൽ അവർ കൊല്ലപ്പെട്ടിട്ടുമുണ്ടാവും. അതിനെ ഹിന്ദുവിരുദ്ധമായി ചിത്രീകരിക്കാനാവില്ല.

മതദ്വന്ദങ്ങളെ സ്വാംശീകരിച്ചതായിരുന്നു സ്വാതന്ത്ര്യ സമരം. എല്ലാ മതങ്ങളും സ്വതന്ത്ര സംഘടനകളുണ്ടാക്കി സാമ്രാജ്യത്വത്തിനെതിരെ പോരാടണമെന്ന കോൺഗ്രസ്​ ആഹ്വാനം മതവിഭാഗങ്ങളിലുമുണ്ടാക്കിയ സ്വാധീനവും പോരാട്ട വീര്യവും കാണാതിരിക്കാനാവില്ല. ഖിലാഫത്തിനെ അതി​​െൻറ തുടർച്ചയായാണ്​ കോൺഗ്രസ്​ കണ്ടത്​. അതിനാൽ, സ്വാതന്ത്ര്യ സമരത്തി​​െൻറ ഭാഗമാണ് മലബാർ സമരമെന്ന മാധവൻ നായരുടെ നിലപാടാണ് ശരി-വടക്കേടത്ത് വിശദീകരിച്ചു.

ഇപ്പോൾ ഈ പ്രശ്നം ഉയർത്തുന്ന സംഘ്​പരിവാർ കേരളത്തെ വർഗീയവത്​കരിക്കാനും ഹിന്ദുത്വ മനോഭാവം സൃഷ്​ടിക്കാനുമുള്ള ശ്രമത്തിലാണ്​. ഇതിനോട്​ ചേർന്നുനിൽക്കും വിധമാണ്​ യുവകലാസാഹിതിയുടെ പ്രസ്താവന. ചരിത്രവസ്തുതകളെ വികലമാക്കാൻ സി.പി.ഐ നിയന്ത്രണത്തിലുള്ള സാംസ്കാരിക സംഘടന ശ്രമിക്കുകയാണെന്ന്​ അദ്ദേഹം ആരോപിച്ചു.