ആൾക്കൂട്ട കൊലപാതകം: ഹൈകോടതി സർക്കാറി​െൻറ വിശദീകരണം തേടി

കൊച്ചി: മോഷണം ആരോപിച്ച്​ അട്ടപ്പാടിയിൽ മധു എന്ന ആദിവാസി യുവാവിനെ ജനക്കൂട്ടം അടിച്ച്​ കൊലപ്പെടുത്തിയ സംഭവത്തിൽ ഹൈകോടതി സർക്കാറി​​​െൻറ വിശദീകരണം തേടി. പരിഷ്‌കൃത സമൂഹത്തിന് നാണക്കേടുണ്ടാക്കിയ സംഭവത്തിൽ ഇടപെടണമെന്നാവശ്യപ്പെട്ട് കെൽസ ചുമതലയുള്ള ഹൈകോടതി ജഡ്​ജി ചീഫ്​ ജസ്​റ്റിസിന്​ നൽകിയ കത്ത്​ പൊതുതാൽപര്യ ഹരജിയായി പരിഗണിച്ചാണ്​ ചീഫ്​ ജസ്​റ്റിസ്​ അടങ്ങുന്ന ഡിവിഷൻ ബെഞ്ചി​​​െൻറ ഉത്തരവ്​. 15 ദിവസത്തിനകം വിശദീകരണം നൽകാനാണ്​ നിർദേശം. കേസിൽ കോടതിയെ സഹായിക്കാൻ അഭിഭാഷകനെ അമിക്കസ് ക്യൂറിയായി നിയമിച്ചു.

ബുധനാഴ്​ച ഹരജി പരിഗണിക്കവെ ഇടപെടൽ ആവശ്യമുള്ള വിഷയമാണിതെന്ന് ഡിവിഷൻ ബെഞ്ച് വാക്കാൽ അഭിപ്രായപ്പെട്ടു. ഇക്കാര്യത്തിൽ എന്തെങ്കിലും ചെയ്​തേ പറ്റൂവെന്നും പറഞ്ഞു. ആദിവാസി സമൂഹത്തിന് ഭക്ഷണം ഇല്ലാത്തതല്ല പ്രശ്നമെന്നും മധുവിനെ ആക്രമിച്ച ആൾക്കൂട്ടത്തി​​​െൻറ മനഃസ്ഥിതിയാണ് പ്രശ്നമെന്നും സർക്കാറിനുവേണ്ടി ഹാജരായ സ്​റ്റേറ്റ് അറ്റോണി വാദിച്ചു. പിന്നെന്തിനാണ് ഭക്ഷണം മോഷ്​ടിച്ചതെന്ന് കോടതി ആരാഞ്ഞു.

അപ്പോഴും ആൾക്കൂട്ടത്തി​​​െൻറ മനോഭാവമാണ് ഇൗ കേസിലെ യഥാർഥ പ്രശ്നമെന്ന് സ്​റ്റേറ്റ് അറ്റോണി ആവർത്തിച്ചു. ഈ വിഷയം അങ്ങേയറ്റം ഗൗരവത്തോടെ സർക്കാർ കാണുന്നുണ്ട്​. ആദിവാസി സമൂഹത്തി​​​െൻറ വീടും ഭൂമിയും കൈമോശം വന്നതാണ് യഥാർഥ പരിഗണനാവിഷയമെന്നും അദ്ദേഹം വിശദീകരിച്ചു. നിയമവിരുദ്ധമായ ഇത്തരമൊരു കൃത്യം ചെയ്യാൻ ആൾക്കൂട്ടത്തെ പ്രേരിപ്പിച്ച ഘടകമെന്തെന്ന് കോടതി ആരാഞ്ഞു. തുടർന്നാണ് വിശദീകരണപത്രിക നൽകാൻ നിർദേശിച്ചത്​.

അരിയടക്കം ഭക്ഷണപദാർഥങ്ങൾ ചെറിയതോതിൽ മോഷ്​ടിച്ചെന്ന പേരിൽ​ യുവാവിനെ അടിച്ചുകൊന്ന സംഭവം സമൂഹത്തിലെ മൂല്യച്യുതിക്ക് ഉദാഹരണമാണെന്നായിരുന്നു​ ജഡ്​ജിയുടെ കത്തിൽ സൂചിപ്പിച്ചിരുന്നത്​. കോടതി ഇടപെട്ട് തിരുത്തൽ നടപടികൾ നിർദേശിക്കേണ്ടത് അനിവാര്യമാണ്​. ഭക്ഷിക്കാൻ ഒന്നുമില്ലാത്തതുകൊണ്ട്​ മധു ആഹാരപദാർഥങ്ങൾ മോഷ്​ടിച്ചത് സത്യമെങ്കിൽ സർക്കാർ നടപ്പാക്കുന്ന പദ്ധതികൾ ഫലം കാണുന്നില്ലെന്നാണ്​ വ്യക്​തമാകുന്നതെന്നും ആദിവാസി ക്ഷേമ പദ്ധതികൾ അവരിലെത്തുന്ന വിധം ഉടച്ചുവാർക്കണമെന്നും കത്തിൽ പറയുന്നു.