ലോക്ഡൗൺ സൃഷ്ടിച്ച ഹതഭാഗ്യനായ സൈക്കിൾ മോഷ്ടാവ് 

കൊടുങ്ങല്ലൂർ: കാസർകോട്ടെ വീടണയാനുള്ള മോഹത്തിൽ ആലപ്പുഴയിൽനിന്ന്​ സൈക്കിൾ മോഷ്ടിച്ച് യാത്ര തുടങ്ങിയ യുവാവ്​ തൃശൂർ ജില്ലയിലെ മതിലകത്ത്​ വെച്ച്​ പൊലീസി​​​​െൻറ വലയിലായി. കാസർകോട്​ നീലേശ്വരം സ്വദേശിയായ ഹരികൃഷ്​ണനാണ് (20) ലോക്ഡൗണിൽ വീടണയാൻ വേണ്ടി ജീവിതത്തിലാദ്യമായി മോഷ്ടാവാകേണ്ടി വന്നത്. 

ഹരികൃഷ്ണൻ മുൻപ്​ ഒരിക്കൽ പോലും മോഷണ കേസിൽ പെട്ടിട്ടില്ലെന്ന്​ പൊലീസ്​ പറഞ്ഞു. എന്നാൽ, സൈക്കിൾ മോഷണത്തിന് ആലപ്പുഴയിൽ പരാതി ലഭിച്ചതോടെ പൊലീസ് കേസെടുത്ത് യുവാവിനെ​ കൊടുങ്ങല്ലൂർ ജുഡീഷ്യൽ മജിസ്​ട്രേട്ട്​ കോടതിയിൽ ഹാജരാക്കി. കോടതി ഇയാളെ റിമാൻഡ് ചെയ്തിരിക്കുകയാണ്.

ബുധനാഴ്​ച ​രാത്രിയാണ്​ സംശയകരമായ സാഹചര്യത്തിൽ യുവാവിനെ കസ്റ്റഡിലെടുത്തത്​. ​ചോദ്യം ചെയ്​തപ്പോൾ പരസ്​പര വിരുദ്ധമായിരുന്നു മറുപടി. ഇയാൾ യാത്ര പുറപ്പെ​ട്ട ആലപ്പുഴ ജില്ലയിലെ പൊലീസ്​ സ്റ്റേഷനുമായി ബന്ധപ്പെട്ടപ്പോഴാണ്​ സൈക്കിൾ മോഷണം സംബന്ധിച്ച്​ പരാതി ഉള്ളതായി അറിഞ്ഞതെന്ന്​ മതിലകം എസ്​​.എച്ച്​.ഒ സി. പ്രമാനന്ദകൃഷ്​ണൻ പറഞ്ഞു. 

ആലപ്പുഴയിൽ ബോട്ടിലായിരുന്നു ഇയാൾക്ക്​ ജോലി. ലോക്ഡൗൺ ആയതോടെ വീട്ടിലേക്ക്​ പോകാൻ അനുവദിക്കാൻ പലവട്ടം അഭ്യർഥിച്ചെങ്കിലും ഫലമുണ്ടായില്ല. ഒടുവിൽ താമസിക്കുന്നതി​​​​െൻറ അടുത്ത വീട്ടിൽ കണ്ട​ സൈക്കിളുമെടുത്ത് ഇയാൾ ബുധനാഴ്​ച രാവിലെ കാസർകോ​ട്ടേക്ക്​ പുറപ്പെടുകയായിരുന്നു. 

കോവിഡ് സാഹചര്യത്തിൽ യുവാവിനെ ഏറ്റെടുക്കാൻ ആരോഗ്യ വകുപ്പും മറ്റുമായി ബന്ധപ്പെട്ടുവെങ്കിലും ഏറ്റെടുക്കാൻ തയാറായില്ലെന്ന് പൊലീസ് പറഞ്ഞു. സൈക്കിൾ മോഷണ പരാതി നിലവിലുള്ള സാഹചര്യത്തിൽ ഇയാൾക്കെതിരെ കേസെടുത്ത്​ കോടിയിൽ ഹാജരാക്കാൻ നിർബന്ധിതരാവുകയായിരുന്നു. കസ്റ്റഡിയിൽ യുവാവ് കടുത്ത ​മനോവിഷമത്തിലായിരുന്നുവെന്നും പൊലീസ് പറയുന്നു.