പാമ്പ്രയിൽ കടുവ

സുൽത്താൻ ബത്തേരി: പാമ്പ്ര വനമേഖലയിൽ കടുവ സാന്നിധ്യം പതിവായതോടെ പുൽപള്ളി -ബത്തേരി റൂട്ടിൽ യാത്രക്കാർക്ക് ജീവൻ പണയപ്പെടുത്തേണ്ട സ്​ഥിതി.

വ്യാഴാഴ്ച വൈകീട്ട് സുൽത്താൻ ബത്തേരിയിലെ സഹകരണ ബാങ്ക് ജീവനക്കാരി കടുവയുടെ മുന്നിൽനിന്ന്​ അത്ഭുതകരമായാണ് രക്ഷപ്പെട്ടത്. ഈ ഭാഗത്ത് മാസങ്ങളായി കടുവ സാന്നിധ്യമുണ്ടെന്നാണ് പ്രദേശവാസികൾ പറയുന്നത്.

ആറരയോടടുത്ത സമയത്ത് സ്​കൂട്ടറിൽ ഇരുളം ഭാഗത്തേക്ക് പോകുമ്പോഴാണ് ബാങ്ക് ജീവനക്കാരി ഷീജയുടെ മുന്നിൽ കടുവ എത്തിയത്. മുന്നിൽ പോയ ബൈക്ക് യാത്രക്കാരൻ തലനാരിഴക്ക് കടുവയുടെ ആക്രമണത്തിൽനിന്ന്​ രക്ഷപ്പെടുന്നത് ഷീജ കണ്ടു.

ട്രാവലർ വാഹനം വന്നതിനാൽ കടുവ കാട്ടിലേക്ക് കയറിപ്പോകുകയായിരുന്നു. അല്ലെങ്കിൽ താൻ കടുവയുടെ ആക്രമണത്തിന് ഇരയാകുമായിരുന്നെന്ന് ഷീജ പറഞ്ഞു.

പാമ്പ്രയിൽ ഒരുവശത്ത് സ്വകാര്യ എസ്​റ്റേറ്റും മറുവശത്ത് വനവുമാണ്. സ്വകാര്യ എസ്​റ്റേറ്റും വനംപോലെയാണ് കിടക്കുന്നത്. സ്വകാര്യ എസ്​റ്റേറ്റിനോട് ചേർന്ന് പാമ്പ്ര സർക്കാർ തോട്ടമുണ്ട്. സർക്കാർ തോട്ടത്തിൽ കടുവ ഇടക്കിടെ എത്താറുണ്ട്.

പൂതാടി പഞ്ചായത്തിലെ പാമ്പ്ര വനത്തോട് ചേർന്ന ഭാഗത്തുവെച്ചാണ് ഏതാനും ആഴ്ചകൾക്ക് മുമ്പ് വനപാലകരെ കടുവ ആക്രമിച്ചത്. ആ കടുവതന്നെയാണ് പുൽപള്ളി റോഡിൽ എത്തിയതെന്ന നിഗമനത്തിലാണ് വനംവകുപ്പ്.