കാത്തിരിപ്പിനൊടുവിൽ മൈലാടി കോളനിയിൽ വീട്​ നിർമാണം തുടങ്ങി

കൽപറ്റ: വീട്, ശുചിമുറി​ തുടങ്ങിയ അടിസ്​ഥാന സൗകര്യങ്ങളില്ലാതെ ദുരിതത്തിലായ മൈലാടി ആദിവാസി കോളനിയിൽ അടിസ്​ഥാന വികസനം ഏർപ്പെടുത്തും. ഏറെ കാലത്തെ കാത്തിരിപ്പിനൊടുവിൽ വീടുകളുടെ നിർമ്മാണം നഗരസഭ ആരംഭിച്ചു. സി.കെ. ശശീന്ദ്രൻ എം.എൽ.എയുടെ വികസന ഫണ്ടിൽ നിന്ന്​ അനുവദിച്ച ഒരു കോടി രൂപ ഉപയോഗിച്ചാണ് ആദ്യഘട്ടത്തിൽ 11 വീടുകളുടെ നിർമാണത്തിന് തുടക്കമായത്. നഗരസഭയിലെ ഒന്നാം വാർഡിലെ കോളനിയിൽ പണിയ വിഭാഗത്തിലെ 29 കുടുംബങ്ങളാണ് താമസിക്കുന്നത്.

കോളനിയിലെ സ്​ഥലപരിമിതി കണക്കിലെടുത്ത് 11 കുടുംബങ്ങൾക്ക് മറ്റൊരു സ്​ഥലം കണ്ടത്തി പുനരധിവസിപ്പിക്കാനും പദ്ധതിയുണ്ട്. പഴയ വീടുകൾ പൊളിച്ചതോടെ കുടുംബങ്ങളെ തൊട്ടടുത്ത പ്രദേശത്ത് താൽക്കാലികമായി നിർമിച്ച ഷെഡുകളിലാണ് താമസിപ്പിച്ചിട്ടുള്ളത്്. വെങ്ങപ്പള്ളി പഞ്ചായത്ത്​ , കൽപറ്റ നഗരസഭ എന്നിവയോട് അതിർത്തി പങ്കിടുന്ന മൈലാടി കോളനിയിലുള്ളവർ ഏറെക്കാലമായി അടിസ്​ഥാന സൗകര്യങ്ങളില്ലാതെ ദുരിതം പേറുകയാണ്. വീടുകളുടെ നിർമാണം പൂർത്തിയാവുന്നതോടെ വേഗം കയറിത്താമസിക്കാനുള്ള തയാറെടുപ്പിലാണ് കോളനിവാസികൾ.