കുഴിയിലകപ്പെട്ട ആനക്കുട്ടിയെ അമ്മയാനയോടൊപ്പം ചേർത്തു
text_fields
പന്തല്ലൂർ ഗ്ലൻറോക്ക് വനഭാഗത്ത് അമ്മയിൽ നിന്ന് വേർപെട്ട കുട്ടിയാനയെ വനപാലകർ
ശുശ്രൂഷിക്കുന്നു
പന്തലൂർ: കൂട്ടംതെറ്റിയ കുട്ടിയാനയെ മണിക്കൂറുകളുടെ ശ്രമങ്ങൾക്കുശേഷം തള്ളയാനക്കൊപ്പം ചേർത്തു വലപാലകർ. പന്തല്ലൂരിനടുത്തുള്ള ഗ്ലെൻറോക്ക് ഫോറസ്റ്റ് റോഡിനോട് ചേർന്നുള്ള കാപ്പിത്തോട്ടത്തിൽ എഴുന്നേൽക്കാൻ കഴിയാതെ റോഡരികിലെ കുഴിയിൽ കുട്ടിയാനയെ കണ്ടവിവരം തൊഴിലാളികളാണ് വനപാലകരെ അറിയിച്ചത്.
ദേവാല ഫോറസ്റ്റർ സഞ്ജീവ്, വനപാലകരായ ശിവകുമാർ, ബാലകൃഷ്ണൻ എന്നിവരുടെ നേതൃത്വത്തിലുള്ള വനപാലക സംഘം നേരിട്ടെത്തി പരിശോധന നടത്തി. എഴുന്നേൽക്കാൻ കഴിയാതെ വന്ന ആനക്കുട്ടിക്ക് വെള്ളവും പാലും നൽകിയപ്പോൾ എഴുന്നേറ്റു നടക്കാൻ തുടങ്ങി.
ഇതോടെ അമ്മയാനയെ കണ്ടെത്താൻ വനപാലകർ ശ്രമം തുടങ്ങുകയായിരുന്നു. വൈകീട്ട് 3.30 ഓടെ അമ്മ ആനയെ കണ്ടെത്തി. തള്ളയാന ഓടിവരുന്നതു കണ്ടതോടെ വനപാലകർ അവിടെ നിന്നും ഓടിമാറി. ഇതോടെ കുട്ടിയാനയുമായി അമ്മയാന ആനക്കൂട്ടത്തോടൊപ്പം ചേർന്നു.