ആളും ആരവവുമില്ലാതെ സുൽത്താൻ ബത്തേരി

സുൽത്താൻ ബത്തേരി: കണ്ടെയ്ൻമെൻറ് സോണായ ബത്തേരിയിൽ ഒരാഴ്ചയോളമായി 90 ശതമാനം വ്യാപാര സ്​ഥാപനങ്ങളും അടഞ്ഞുകിടക്കുന്നു.

രണ്ട് ബസ്​ സ്​റ്റാൻഡുകളും വിജനമാണ്​. കണ്ടെയ്ൻമെൻറ് സോൺ ശരിക്കും ജനജീവിതത്തെ ബാധിച്ചിരിക്കുകയാണ്. മെഡിക്കൽ ഷോപ്, ബേക്കറി, പച്ചക്കറി, ചില സൂപ്പർ മാർക്കറ്റുകൾ, ഹോട്ടലുകളിലെ പാർസൽ എന്നിവ മാത്രമാണ് ഇപ്പോഴുള്ളത്. വ്യാപാര സ്​ഥാപനങ്ങൾ തുറക്കാത്തതിനാൽ നഗരത്തിലേക്ക് ഇപ്പോൾ ആളുകളും എത്തുന്നില്ല.

ഏതാനും സ്വകാര്യ ബസുകൾ ഓടുന്നുണ്ടെങ്കിലും കെ.എസ്​.ആർ.ടി.സി സർവിസ്​ നിർത്തി​. കെ.എസ്​.ആർ.ടി.സി മാത്രം സർവിസ്​ നടത്തിയിരുന്ന പാട്ടവയൽ, അമ്പലവയൽ, കരിപ്പൂര് ഭാഗങ്ങളിലുള്ളവർക്ക് അത്യാവശ്യ കാര്യങ്ങൾക്ക്​ യാത്ര ചെയ്യാൻ ഇപ്പോൾ പെടാപ്പാടുപെടണം.

അതേസമയം, സ്വകാര്യ വാഹനങ്ങൾ നിരവധി നഗരത്തിലെത്തുന്നുണ്ട്. വാഹനങ്ങൾ നിർബാധം കടത്തിവിട്ട് കച്ചവടക്കാരെ മാത്രം നിയന്ത്രണത്തിൽ കൊണ്ടുവരുന്നതിനെതിരെ വ്യാപാരികൾക്കിടയിൽ മുറുമുറുപ്പ് ഉണ്ടായിട്ടുണ്ട്. ഇത് നാലാം തവണയാണ് സുൽത്താൻ ബത്തേരി കണ്ടെയ്ൻമെൻറ് മേഖലയാകുന്നത്.