ചെയർമാ​െൻറ അവധി; ബത്തേരി നഗരസഭയിലെ രാഷ്​ട്രീയ വിവാദങ്ങൾക്ക് തൽക്കാലം ഇടവേള

സുൽത്താൻ ബത്തേരി: നഗരസഭ ചെയർമാൻ ടി.എൽ. സാബു അവധിയിൽ പോയതോടെ സുൽത്താൻ ബത്തേരിയിലെ രാഷ്​ട്രീയ തർക്കങ്ങൾക്ക്​​ താൽക്കാലിക ശമനം.

ചെയർമാ​െൻറ ചില പരാമർശങ്ങൾ ആയുധമാക്കി യു.ഡി.എഫ് വൻ പ്രതിഷേധങ്ങൾക്ക് കോപ്പുകൂട്ടുന്നതിനിടയിലാണ് പെട്ടെന്നുള്ള അവധി. ആരോഗ്യ പ്രശ്നങ്ങളാൽ വിശ്രമിക്കുന്നുവെന്നാണ് ചെയർമാൻ പറഞ്ഞതെങ്കിലും യു.ഡി.എഫ് സമരങ്ങളെ മുൻകൂട്ടി കണ്ടുള്ള സി.പി.എം നീക്കമാണ് അവധിക്കു പിന്നിലെന്ന് സൂചനയുണ്ട്​. സി.പി.എം ചെയർമാനെ വിളിച്ച്​ വിശദമായി സംസാരിച്ചതിനു പിന്നാലെയാണ്​ അവധി.

ബൈപാസ്​ റോഡ് ഉദ്ഘാടനവും തുടർന്ന് വാട്സ്​ആപ് വഴിയുള്ള വിവാദ പരാമർശങ്ങളും മുൻനിർത്തി ചെയർമാ​െൻറ രാജി ആവശ്യപ്പെട്ടാണ് യു.ഡി.എഫ് രംഗത്തിറങ്ങിയത്. വനിത കൗൺസിലർമാർ ഇക്കാര്യമുന്നയിച്ച് വാർത്തസമ്മേളനം നടത്തി.

ചെയർമാൻ സി.പി.എമ്മുകാരനല്ലെങ്കിലും നഗരസഭ ഭരണം നിയന്ത്രിക്കുന്ന സി.പി.എമ്മിനെയാണ് യു.ഡി.എഫ് ലക്ഷ്യമിട്ടത്. ചെയർമാ​െൻറ രാജി ആവശ്യപ്പെട്ട് സമരങ്ങൾ നടന്നാൽ തെരഞ്ഞെടുപ്പ് അടുത്തുവരുന്ന സാഹചര്യത്തിൽ അത് ചെയർമാനെക്കാളും കൂടുതൽ സി.പി.എമ്മിനെയാണ് ബാധിക്കുകയെന്നും വ്യക്തമായിരുന്നു.

സുൽത്താൻ ബത്തേരിയിലെ യു.ഡി.എഫി​െൻറ മുഖ്യ എതിരാളിയാണ്​ ചെയർമാൻ ടി.എൽ. സാബു. കഴിഞ്ഞ തെരഞ്ഞെടുപ്പിൽ യു.ഡി.എഫ്​ സ്ഥാനാർഥിയായി വിജയിച്ചതിനു ശേഷമായിരുന്നു അദ്ദേഹത്തി​െൻറ ഇടതുപക്ഷത്തേക്കുള്ള മാറ്റം. ഇത്​ യു.ഡി.എഫിൽ മാത്രമല്ല കേരള കോൺഗ്രസിലും നിരവധി തർക്കങ്ങൾക്ക്​ കാരണമായി.

യു.ഡി.എഫിന്​ നഗരസഭ ഭരണം കൈവിട്ടതി​െൻറ കാരണം സാബുവി​െൻറ നിലപാടായിരുന്നു​. വിമതനായ സാബുവിന്​ ചെയർമാൻ സ്ഥാനം നൽകിയാണ്​ യു.ഡി.എഫിനെ സി.പി.എം​ വെട്ടിലാക്കിയത്​.

യു.ഡി.എഫിന് ഭൂരിപക്ഷം നഷ്​ടപ്പെടാൻ കേരള കോൺഗ്രസ്​ മാണി ഗ്രൂപ് അംഗത്തി​െൻറ കാലുമാറ്റം കാരണമായത്​ ഇപ്പോഴും കോൺഗ്രസിനെയും ലീഗിനെയും അലട്ടുന്ന വിഷയമാണ്​.

അതിനാൽ ചെയർമാനെ അടിക്കാൻ കിട്ടുന്ന അവസരം യു.ഡി.എഫ് പാഴാക്കാൻ തയാറില്ലായിരുന്നു. 2019 ഫെബ്രുവരിയിൽ യു.ഡി.എഫ് ചെയർമാനെതിരെ കൊണ്ടുവന്ന അവിശ്വാസപ്രമേയം പരാജയപ്പെട്ടിരുന്നു. അതിനുശേഷം കാര്യമായ ഒരു വിവാദമുണ്ടാകുന്നത് ബൈപാസ്​ ഉദ്ഘാടനത്തിനു ശേഷമാണ്.

ചെയർമാ​െൻറ രാജിയിൽ കുറഞ്ഞൊരു വിട്ടുവീഴ്ചക്ക്​ യു.ഡി.എഫ് തയാറല്ലെന്ന് മുസ്​ലിം ലീഗ് നേതാവ് പി.പി. അയ്യൂബ് പറഞ്ഞു. ഇപ്പോൾ നഗരം ഉൾപ്പെടുന്ന ഭാഗം കണ്ടെയ്ൻമെൻറ് സോണായതുകൊണ്ടാണ് തൽക്കാലം സമരം ഒഴിവാക്കിയിരിക്കുന്നതെന്നും അദ്ദേഹം വ്യക്തമാക്കി.

ചെയർമാ​െൻറ അവധി തീരുന്ന 25നുശേഷം യു.ഡി.എഫ് സമരവുമായി ഇറങ്ങും. സി.പി.എം അതിനെ എങ്ങനെ പ്രതിരോധിക്കുമെന്നത്​ ഇനി കണ്ടറിയണം.

വരാനിരിക്കുന്ന തദ്ദേശ തെരഞ്ഞെടുപ്പിൽ സുൽത്താൻ ബത്തേരി നഗരസഭക്ക് വലിയ പരിഗണനയാണ്​ സി.പി.എം നൽകുന്നത്​. അതിനായി അവർ കരുനീക്കം ശക്തമാക്കി. ലീഗിലും കോൺഗ്രസിലും രൂപംകൊള്ളാനിടയുള്ള വൈരുധ്യം മുതലാക്കാൻ ശക്തമായ നീക്കമുണ്ട്​.

അതേസമയം, ഒറ്റക്കെട്ടായി തെരഞ്ഞെടുപ്പിനെ നേരിട്ട്​ ബത്തേരിയിൽ അധികാരം തിരിച്ചുപിടിക്കുമെന്ന്​ യു.ഡി.എഫ്​ നേതാക്കൾ പറയുന്നു. ബത്തേരിയുടെ വികസനമാണ്​ എൽ.ഡി.എഫ് ഉയർത്തിക്കാണിക്കുന്നത്​.