ഈ ആതുരാലയത്തിനും വേണം ചികിത്സ

വൈത്തിരി: ആദിവാസി മേഖലയായ സുഗന്ധഗിരിയിലെ പ്രാഥമികാരോഗ്യ കേന്ദ്രം ഏതു സമയവും തകർന്നുവീഴാറായ നിലയിൽ. 50 വർഷത്തിലേറെ പഴക്കമുള്ള കെട്ടിടത്തി​​െൻറ മേൽക്കൂരയും സീലിങ്ങും അടർന്നുവീണതു കാരണം ചോർന്നൊലിക്കുകയാണ്. രോഗികൾക്കും ഡോക്ടറടക്കം ജീവനക്കാർക്കും മഴ പെയ്​താൽ നനയാതെ നിൽക്കാനൊരിടമില്ല. ലക്ഷക്കണക്കിന് രൂപയുടെ യന്ത്രസാമഗ്രികളും മരുന്നും നശിക്കുകയാണ്. കെട്ടിടത്തി​​െൻറ ഓടുകൾ പലതും പാറിപ്പോവുകയും പൊട്ടുകയും ചെയ്തിട്ടുണ്ട്. വെള്ളമിറങ്ങി പലയിടത്തും സീലിങ്​ പൊട്ടി അപകടാവസ്ഥയിൽ തൂങ്ങിക്കിടക്കുന്നു. ചുവരുകളും ജനലുകളും നനഞ്ഞു ദ്രവിച്ചു. പല മുറികളുടെയും വാതിൽ ഇളകി വീഴാറായി. ആദിവാസി മേഖലയിലെ ഏക സർക്കാർ ആതുരാലയമാണിത്​, സർക്കാറും ആരോഗ്യ വകുപ്പും തുടരുന്ന അനാസ്​ഥയുടെ സ്​മാരകം.

സുഗന്ധഗിരി ഭാഗത്തെ രോഗികൾ ആശുപത്രിയിൽ വരാൻ മടിക്കുകയാണ്. നേരത്തെ ദിവസവും നൂറിലധികം രോഗികൾ വന്നിടത്ത്​ ഇപ്പോൾ നാലിലൊന്നായി ചുരുങ്ങി. ശൗചാലയങ്ങൾ വൃത്തിഹീനവും ഉപയോഗശൂന്യവുമാണ്. ഡോക്ടറുടെ മുറിയോട് ചേർന്ന ടോയ്​ലറ്റാണ് എല്ലാവരും ഉപയോഗിക്കുന്നത്. ജീവനക്കാരും രോഗികളും അപകടം പതിയിരിക്കുന്ന ഈ മേൽക്കൂരക്ക് കീഴിൽ പേടിച്ചാണ് കഴിയുന്നത്. നനഞ്ഞുകുതിർന്ന ചുവരുകളിൽ പലയിടത്തും വൈദ്യുതി പ്രവാഹമുണ്ട്. ആരോഗ്യ വകുപ്പുമായി ബന്ധപ്പെട്ട രേഖകൾ ശരിയാക്കാൻ വൈത്തിരിയിലുള്ളവർ ഈ ആരോഗ്യ കേന്ദ്രത്തിലെത്തണം. ജീവനക്കാർക്ക് ഇരിക്കാൻ പോലും സൗകര്യമില്ല. ഡോക്​ടറും ആശുപത്രി ജീവനക്കാരും ഫീൽഡ് ജീവനക്കാരുമടക്കം 25 പേർ ഇവിടെയുണ്ട്​.

പ്രാഥമികാരോഗ്യകേന്ദ്രം പൊളിഞ്ഞുവീഴാറായ അവസ്ഥയായിട്ടും 2019-2020 വർഷം ആർദ്രം പദ്ധതി പ്രകാരം കുടുംബാരോഗ്യ കേന്ദ്രമായി ഉയർത്തുകയും ഡോക്ടറടക്കമുള്ള ജീവനക്കാരുടെ പോസ്​റ്റ്​ ഉണ്ടാക്കുകയും ചെയ്തിരുന്നു. ഡോക്ടറെയും ജീവനക്കാരെയും നിയമിക്കുകയും ചെയ്തു. ഇതോടൊപ്പം ലാബിനാവശ്യമായ സാമഗ്രികൾ ഇവിടെ എത്തിച്ചു. എന്നാൽ, സാമഗ്രികൾ നാശത്തി​​െൻറ വക്കിലാണ്. നേരത്തെ ഇതേ പദ്ധതിയിൽ ഹെൽത്ത് സ​െൻറർ കെട്ടിടത്തിനും മറ്റുമായി 84 ലക്ഷം രൂപയുടെ എസ്​റ്റിമേറ്റ് തയാറാക്കുകയും 40 ലക്ഷം രൂപ വകയിരുത്തുകയും ചെയ്തിരുന്നു. കേന്ദ്ര സർക്കാറി​െൻറ കോർപസ് ഫണ്ട് പ്രകാരം സുഗന്ധഗിരിയിൽ ബഹുനില കെട്ടിടം, സമഗ്രമായ റോഡ്, കൺവെൻഷൻ സ​െൻറർ എന്നിവക്കായി 40 കോടി രൂപയുടെ പ്ലാൻ തയാറായിട്ടുണ്ടത്രെ.

വൈത്തിരി പഞ്ചായത്തിന് കീഴിൽ വരേണ്ട ഹെൽത്ത് സ​െൻറർ നിലകൊള്ളുന്നത് പൊഴുതന പഞ്ചായത്തിലെ സുഗന്ധഗിരിയിലാണ്. ഇതുമൂലം ഇരുപഞ്ചായത്തുകളും കെട്ടിടം നന്നാക്കാൻ മുന്നോട്ടു വരുന്നില്ലെന്നതാണ് സത്യം. വൈത്തിരി പഞ്ചായത്തുമായി ഒത്തുചേർന്നു കെട്ടിടം പുതുക്കിപ്പണിയാനുള്ള പ്രോജക്​ട്​ തയാറായിട്ടുണ്ടെന്നും ലോക്ഡൗൺ കാരണം മറ്റു കാര്യങ്ങൾ നടക്കാതെ പോയതാണെന്നും പൊഴുതന പഞ്ചായത്ത് പ്രസിഡൻറ്​ എൻ.സി. പ്രസാദ് പറഞ്ഞു. കെട്ടിടത്തി​​െൻറ അപകടാവസ്ഥ ജില്ല കലക്ടറുടെ ശ്രദ്ധയിൽ കൊണ്ടുവരുകയും അടിയന്തരമായി ഇടപെടണമെന്നാവശ്യപ്പെടുകയും ചെയ്തതായി ജില്ല മെഡിക്കൽ ഓഫിസർ ഡോ. ആർ. രേണുക പറഞ്ഞു. വൈത്തിരി ഗ്രാമപഞ്ചായത്ത് പ്രസിഡൻറുമായും ഇക്കാര്യം ചർച്ച ചെയ്തിട്ടുണ്ട്. ജീവനക്കാർ വളരെ കഷ്​ടപ്പെട്ടാണ് ഈ സ്ഥാപനത്തിൽ എത്തിച്ചേരുന്നതും ജോലി ചെയ്യുന്നതും.

വൈത്തിരിയിൽനിന്ന്​ സുഗന്ധഗിരി ഹെൽത്ത് സ​െൻററിലെത്താൻ അഞ്ചര കിലോമീറ്ററോളമുണ്ട്. കോളിച്ചാൽ ഭാഗം കഴിഞ്ഞാൽ സുഗന്ധഗിരി വരെ പൊട്ടിപ്പൊളിഞ്ഞ റോഡാണ്​. വല്ലപ്പോഴും വരുന്ന കെ.എസ്.ആർ.ടി.സി ബസാണ് ആശ്രയം. ഇപ്പോൾ അതും ഓടുന്നില്ല. ആതുരാലയത്തിലെത്താൻ ജീവനക്കാരും രോഗികളും ഏറെ ദുരിതം സഹിക്കണം.