കുരുമുളക്​ വള്ളിക്ക്​ രോഗബാധ; കർഷകർക്ക് തിരിച്ചടി

പുൽപള്ളി: മഴമാറി വെയിൽ തുടങ്ങിയതോടെ കുരുമുളകുവള്ളികൾക്ക്​ രോഗബാധകൾ പടർന്നുപിടിക്കുന്നു. മഞ്ഞളിപ്പ് അടക്കം രോഗങ്ങളാണ് പടർന്നുപിടിച്ചിരിക്കുന്നത്.

ചെടിയുടെ ചുവട്ടിൽ വേരുകൾ കാർന്നുതിന്നുന്ന കീടങ്ങളുടെ ശല്യവും വർധിച്ചിട്ടുണ്ട്. ഇത് ചെടിയെ വേഗത്തിൽ ഉണക്കിക്കളയുന്നു. കുരുമുളകുകൃഷിയെ മാത്രം ആശ്രയിച്ച് ജീവിക്കുന്ന കർഷകരാണ് പുൽപള്ളി, മുള്ളൻകൊല്ലി പഞ്ചായത്തുകളിൽ ഭൂരിഭാഗവും. രോഗകീടബാധകൾ കർഷകർക്ക് തിരിച്ചടിയായി.

കുരുമുളകി​െൻറ വിലയിടിവും തുടരുകയാണ്. ഇതിനിടെയാണ് രോഗകീടബാധകളും വ്യാപകമായിരിക്കുന്നത്. കീടബാധ വരുംനാളുകളിൽ പടർന്നുപിടിച്ചാൽ പുൽപള്ളി, മുള്ളൻകൊല്ലി പഞ്ചായത്തുകളുടെ സമ്പദ്ഘടനയെയും പ്രതികൂലമായി ബാധിക്കുമെന്ന് കർഷകർ പറയുന്നു.