'വഴിക്കണ്ണ്' വാഹനങ്ങൾക്ക്​ പൊലീസ്​ അകമ്പടി ഒഴിവാക്കി

സുൽത്താൻ ബത്തേരി: കല്ലൂരിൽനിന്ന്​ സ്​റ്റിക്കർ പതിച്ച വാഹനങ്ങൾക്ക് പൊലീസ്​ അകമ്പടി പോകുന്നത് ഒഴിവാക്കി. ഇതോടെ, അതിർത്തി കടന്നെത്തുന്ന വാഹനങ്ങൾ തോന്നുന്നിടത്ത് നിർത്തുന്നത് പതിവായി. ചൊവ്വാഴ്ച ഉച്ചക്ക് മൂലങ്കാവിൽ കാർ യാത്രികരെ ഓട്ടോ തൊഴിലാളികൾ വിരട്ടിയോടിച്ചു.

സ്​റ്റിക്കർ പതിച്ച വെള്ളക്കാറിലെത്തിയവർ മൂലങ്കാവ് ബേബി സ്​റ്റോറിലാണ് കയറാൻ ശ്രമിച്ചത്. സാധനങ്ങൾക്ക് ഓർഡർ കൊടുത്ത് കാത്തു നിൽക്കുമ്പോൾ ഓട്ടോ തൊഴിലാളികൾ ഇവരെ വളഞ്ഞു. ഇതോടെ കാർ യാത്രികർ സ്​ഥലംവിട്ടു. കഴിഞ്ഞ ഏതാനും ദിവസങ്ങളായി മൂലങ്കാവിൽ ഇത്തരം സംഭവം ആവർത്തിക്കുന്നുണ്ട്.

കർണ്ണാടക, തമിഴ്നാട് അതിർത്തി കടന്നുവരുന്ന വാഹനങ്ങൾക്കാണ് കല്ലൂരിലെ കോവിഡ് ഫെസിലിറ്റേഷൻ സെൻററിൽനിന്ന്​ 'വഴിക്കണ്ണ്' സ്​റ്റിക്കർ പതിക്കുന്നത്. ഈ സ്​റ്റിക്കർ പതിച്ച വാഹനങ്ങൾ ലക്ഷ്യസ്​ഥാനത്ത് എത്തുന്നതു വരെ മറ്റൊരിടത്തും നിർത്താൻ പാടില്ല. എന്നാൽ, സ്​റ്റിക്കർ പതിച്ച വാഹനങ്ങൾ വിവിധയിടങ്ങളിൽ നിർത്തുന്നത് പതിവായതോടെയാണ് ഒരുമാസം മുമ്പ് കല്ലൂരിൽനിന്നും കോൺവോയി അടിസ്​ഥാനത്തിൽ പൊലീസ്​ അകമ്പടി ഏർപ്പെടുത്തിയത്. ഇതോടെ, നിർത്തുന്ന വാഹനങ്ങളെ കൈയോടെ പിടികൂടാനാകുമായിരുന്നു. ഏതാനും ദിവസങ്ങൾക്കുശേഷം പൊലീസ്​ നിരീക്ഷണത്തിൽനിന്നു പിന്മാറി. ഇതോടെ സ്​റ്റിക്കർ പതിച്ച വാഹനങ്ങളിലെത്തുന്നവർ കടകളിലും മറ്റും കയറുന്നത്​ പതിവായി.

തമിഴ്നാട്ടിൽനിന്ന്​ പ്രധാനപ്പെട്ട നാല് ചെക്ക്പോസ്​റ്റുകളാണ് കേരള അതിർത്തിയിലുള്ളത്. ഈ ചെക്ക് പോസ്​റ്റ് കടക്കുന്നവർക്കും കല്ലൂരിലെ കോവിഡ് ഫെസിലിറ്റേഷൻ സെൻററിൽ എത്തണം. അതിനുശേഷം വീടുകളിലെത്തി ക്വറൻറീനിൽ കഴിഞ്ഞതിനുശേഷമേ പുറത്തിറങ്ങാനാവൂ. നൂറ് കണക്കിന് വാഹനങ്ങൾ ദിവസവും അതിർത്തി കടന്ന് എത്തുന്നുണ്ട്.