മാവോവാദി വെടിവെപ്പ്​: വനത്തിൽ തിരച്ചിൽ തുടരുന്നു

പടിഞ്ഞാറത്തറ: മാവോവാദി യുവാവ് വേൽമുരുകൻ തണ്ടർബോൾട്ട് സേനയുടെ വെടിവെപ്പിൽ കൊല്ലപ്പെട്ട സംഭവത്തെ തുടർന്ന്​ കാപ്പിക്കളം മീൻമുട്ടി വെള്ളച്ചാട്ടത്തിനു സമീപം വനത്തിൽ രണ്ടാം ദിവസവും പരിശോധന തുടർന്നു. തോക്കുധാരികളായ തണ്ടർബോൾട്ട് സംഘവും ക്രൈംബ്രാഞ്ച് എസ്.പിയുടെ നേതൃത്വത്തിലുള്ള പൊലീസുമാണ് പരിശോധന നടത്തിയത്.

തമിഴ്നാട് തേനി സ്വദേശി വേൽമുരുകനൊപ്പം ഉണ്ടായിരുന്നവർക്ക് വേണ്ടിയുള്ള തിരച്ചിലാണ് തുടരുന്നത്​. അതേസമയം മാധ്യമപ്രവർത്തകർക്ക്​ സംഭവദിവസം സ്ഥലത്തേക്ക് പ്രവേശിപ്പിക്കാത്ത പൊലീസ്​ ബുധനാഴ്​ച ഏഴ് ക്യാമറാമാൻ മാർക്ക്​ ​പ്രവേശനം നൽകി. വൈത്തിരി വെടിവെപ്പിനു സമാനമായി മനുഷ്യാവകാശ പ്രവർത്തകർക്കും മാധ്യമങ്ങൾക്കും ആദ്യ ദിവസം വിലക്ക് ഏർപ്പെടുത്തിയത്​ സംശയം സൃഷ്​ടിക്കുന്നു. ചൊവ്വാഴ്ച രാവിലെ 9.15നാണ് വെടിവെപ്പുണ്ടായതെന്നാണ്​ പൊലീസ്​ വിശദീകരണം. നക്സൽ വിരുദ്ധ സേന പ്രദേശത്ത് പരിശോധന നടത്തുന്നതിനിടെ പ്രകോപനമില്ലാതെ മാവോവാദികൾ പൊലീസിനുനേരെ വെടിയുതിർത്തെന്നാണ് പൊലീസ്​ പറയുന്നത്​. വെടിവെപ്പ് അരമണിക്കൂറോളം നീണ്ടു. എന്നാൽ, തൊട്ടടുത്ത കോളനികളിലുള്ളവർ പോലും സംഭവം അറിയുന്നത് മാധ്യമ പ്രവർത്തകരിൽനിന്നും പൊലീസ് സംഘം സ്ഥലത്തെത്തിയപ്പോഴുമാണ്.

വെടിവെപ്പ് നടക്കുന്നതി െൻറ തൊട്ടുമുമ്പുള്ള ദിവസങ്ങളിൽ വനംവകുപ്പ് ജീവനക്കാരും നാട്ടുകാരും നാട്ടിലിറങ്ങിയ ആനയെ തുരത്തുന്നതിന്​ ഈ കാടുകളിൽ സഞ്ചരിച്ചിരുന്നു. തിങ്കളാഴ്ച രാത്രിയോടെ ഒറ്റയാനെ തുരത്തി കയറ്റിവിട്ട വനപ്രദേശത്താണ് ചൊവ്വാഴ്ച രാവിലെ വെടിവെപ്പ്. ആനയെ തുരത്താൻ കാടുകയറിയ സമയത്തൊന്നും മാവോവാദി സാന്നിധ്യം ശ്രദ്ധയിൽപെട്ടിട്ടില്ലെന്ന് പ്രദേശവാസികളും വനംവകുപ്പ് ജീവനക്കാരിൽ ചിലരും പറഞ്ഞു.