കു​ടി​വെ​ള്ള​മി​ല്ല; പ​ഞ്ചാ​യ​ത്ത് ഓ​ഫി​സി​ൽ ക​ഞ്ഞിവെ​ച്ച് പ്ര​തി​ഷേ​ധം

സു​ൽ​ത്താ​ൻ ബ​ത്തേ​രി: ഇ​നി​യെ​ങ്കി​ലും ത​ങ്ങ​ൾക്ക് കു​ടി​വെ​ള്ളം കി​ട്ടു​മെ​ന്ന പ്ര​തീ​ക്ഷ​യി​ലാ​ണ് പൂ​താ​ടി ചെ​റു​കു​ന്ന് ഉന്നതി നിവാസികൾ. ഏ​റെ കാ​ല​മാ​യി കു​ടി​വെ​ള്ള​മി​ല്ലാ​തെ ക​ഷ്ട​പ്പെ​ടു​ക​യാ​ണ് ഇ​വി​ടെ​യു​ള്ള​വ​ർ. കു​ടി​വെ​ള്ളം എ​ത്ര​യും പെ​ട്ടെ​ന്ന് ല​ഭ്യ​മാ​ക്കാ​മെ​ന്ന പ​ഞ്ചാ​യ​ത്ത് അ​ധി​കൃ​ത​രു​ടെ വാ​ഗ്ദാ​നം പാ​ലി​ക്ക​പ്പെ​ടാ​തെ വ​ന്ന​പ്പോ​ൾ ഒ​ടു​വി​ൽ പ​ഞ്ചാ​യ​ത്ത് ഓ​ഫി​സി​നു​മു​ന്നി​ൽ ക​ഞ്ഞി​വെ​ച്ച് അ​വ​ർ പ്ര​തി​ഷേ​ധി​ച്ചു.

പൂ​താ​ടി പ​ഞ്ചാ​യ​ത്തി​ലെ ചെ​റു​കു​ന്ന് ഉന്നതിയി​ലു​ള്ള​വ​രാ​ണ് വ്യ​ത്യ​സ്ത സ​മ​ര​വു​മാ​യി തി​ങ്ക​ളാ​ഴ്ച പ​ഞ്ചാ​യ​ത്ത് ഓ​ഫി​സി​ൽ എ​ത്തി​യ​ത്. കു​ടി​വെ​ള്ള​ വു​മാ​യി എ​ത്തി​യി​രു​ന്നു. പ​ഞ്ചാ​യ​ത്ത​ധി​കൃ​ത​ർ ന​ൽ​കി​യ ഉ​റ​പ്പ് പാ​ലി​ക്കാ​ത്ത​തി​നെ തു​ട​ർ​ന്നാ​ണ് തി​ങ്ക​ളാ​ഴ്ച ക​ഞ്ഞി​വെ​ച്ച് പ്ര​തി​ഷേ​ധി​ച്ച​ത്. പ​ഞ്ചാ​യ​ത്ത് ഓ​ഫി​സി​ന​ക​ത്തേ​ക്ക് പൊ​തു​ജ​ന​ങ്ങ​ൾ​ക്ക് പ്ര​വേ​ശി​ക്കാ​ൻ ക​ഴി​യാ​ത്ത​വി​ധ​മാ​യി​രു​ന്നു സ​മ​രം.

ചെ​റു​കു​ന്ന് നാ​ല് സെ​ന്റ് ഉന്നതി​ക്കാ​യി പ​ഞ്ചാ​യ​ത്ത് കു​ഴ​ൽ കി​ണ​റും ടാ​ങ്കും നി​ർ​മി​ച്ചി​ട്ടു​ണ്ട്. എ​ന്നാ​ൽ, വൈദ്യുതി ല​ഭ്യ​മാ​യി​ട്ടി​ല്ല. ഇ​താ​ണ് വെ​ള്ളം ല​ഭ്യ​മാ​കാ​ൻ ത​ട​സ്സ​മാ​യി​രി​ക്കു​ന്ന​ത്. ഇ​ക്കാ​ര്യ​ത്തി​ൽ പ​ഞ്ചാ​യ​ത്ത് മെ​ല്ലെ​പ്പോ​ക്ക് സ​മീ​പ​ന​മാ​ണെ​ന്നാ​ണ് പ്രദേശവാസികൾ​ പ​റ​യു​ന്ന​ത്.