കരടിയുടെ ആക്രമണത്തിൽ യുവാവിന് പരിക്ക്

മാനന്തവാടി: കരടിയുടെ ആക്രമണത്തിൽ യുവാവിന് പരിക്കേറ്റു. തോല്‍പ്പെട്ടി കക്കേരി കാട്ടുനായ്ക്ക കോളനിയിലെ രഘുവി​െൻറ മകന്‍ ഉദയനാണ് (38) പരിക്കേറ്റത്. കഴിഞ്ഞ ദിവസം ഉച്ചക്ക് അയല്‍വാസികളോടൊപ്പം വിറക് ശേഖരിക്കാനായി വീടിനടുത്തെ വനത്തിനുള്ളില്‍ പോയപ്പോഴാണ് സംഭവം.

കരടിയുടെ മുന്നില്‍ പെട്ടുപോയ ഉദയന്‍ രക്ഷപ്പെടാന്‍ ശ്രമിക്കുന്നതിനിടെ മുഖത്തടിക്കുകയായിരുന്നു. തുടര്‍ന്ന് ഓടി രക്ഷപ്പെട്ട ഉദയനെ നാട്ടുകാര്‍ വിന്‍സെൻറ് ഗിരി ആശുപത്രിയിലെത്തിച്ചു.

മുഖത്തും ഇടത് കൈക്കും സാരമായി പരിക്കേറ്റ ഉദയന് അവിടെ വെച്ച് പ്രാഥമിക ചികിത്സ നല്‍കിയ ശേഷം കോഴിക്കോട് മെഡിക്കൽ കോളജ്​ ആശുപത്രിയിലേക്ക് കൊണ്ടുപോയി.