കുരുമുളക് തട്ടിപ്പ്: പ്രതികളെ സംരക്ഷിക്കുന്നതായി ആരോപണം; പൊലീസ്​ അന്വേഷണം ഇഴയുന്നു

മാനന്തവാടി: മൂന്നുവർഷം മുമ്പ് ജില്ലയിലെ നിരവധി കുരുമുളക് കര്‍ഷകരെ കബളിപ്പിച്ച് ലക്ഷക്കണക്കിന് രൂപ തട്ടിപ്പ് നടത്തിയ കേസ്​ ഇഴയുന്നു. പ്രതികളെ പിടികൂടുന്നതില്‍​ പൊലീസിനെ തടയുന്നത് സംസ്ഥാനത്തെ ഉന്നത രാഷ്​ട്രീയ നേതാവി​െൻറ ഇടപെടലാണെന്ന് കർമസമിതി ഭാരവാഹികള്‍ വാര്‍ത്തസമ്മേളനത്തില്‍ ആരോപിച്ചു.

പല കേസുകളിലും അന്വേഷണം നേരിടുന്ന പ്രതിക്ക്​ ജില്ലയിലെ കുരുമുളക് തട്ടിപ്പ് കേസില്‍ ബന്ധമുള്ളതായും പ്രതിയെ സംരക്ഷിക്കുന്ന നിലപാട് തുടര്‍ന്നാല്‍ ശക്തമായ പ്രതിഷേധം ആരംഭിക്കുമെന്നും ഭാരവാഹികള്‍ അറിയിച്ചു. ഭരണകക്ഷി നേതാവി​െൻറ മകൻ കേസിൽ ഇടപെടുന്നുണ്ട്​. കോഴിക്കോട്, വടകര, പുല്‍പള്ളി സ്വദേശികളായ നാലുപേര്‍ ചേര്‍ന്നാണ് അധിക വില വാഗ്ദാനം ചെയ്ത് ജില്ലയിലെ കര്‍ഷകരില്‍നിന്ന്​ കുരുമുളക് ശേഖരിച്ചത്​. ഒരു മാസത്തെ അവധിക്ക് ചെക്ക് നല്‍കി. എന്നാൽ, പണം ലഭിച്ചില്ല. ഇങ്ങനെ അഞ്ചുകോടിയോളം രൂപ തട്ടിയെടുത്തിട്ടുണ്ട്​.

ഇതുസംബന്ധിച്ച് ജില്ലയിലെ പൊലീസ് സ്​റ്റേഷനുകളിൽ പരാതികള്‍ നൽകിയിട്ടുണ്ട്​. പ്രതികളെ അറസ്​റ്റ്​ ചെയ്യണമെന്ന്​ കോടതി നിര്‍ദേശം ഉണ്ടായിട്ടും ഉന്നത രാഷ്​ട്രീയ സ്വാധീനത്തിൽ പൊലീസ് ഒഴിഞ്ഞു മാറുകയാണ്.

തട്ടിപ്പ് കേസ്​ സി.ബി.ഐ അന്വേഷിക്കണമെന്നും കർമസമിതി ഭാരവാഹികള്‍ ആവശ്യപ്പെട്ടു. വാര്‍ത്തസമ്മേളനത്തില്‍ ജോണി കുഴിവേലില്‍, വര്‍ക്കി എല്ലംപുഴ, ജോര്‍ജ് പാക്കം, സിജോ വര്‍ഗീസ് എന്നിവര്‍ പങ്കെടുത്തു.