ജനമനസ്സറിയാന്‍ ജില്ലപഞ്ചായത്ത്; പഞ്ചവത്സര പദ്ധതിക്ക് ആശയങ്ങള്‍ നല്‍കാം
text_fields
കൽപറ്റ: ജില്ലയുടെ വികസന-ക്ഷേമ പ്രവര്‍ത്തനങ്ങള്‍ സംബന്ധിച്ച് ജനമനസ്സറിയുന്നതിന് ജില്ല പഞ്ചായത്ത്. അടുത്ത അഞ്ചു വര്‍ഷം ജില്ലയില്‍ നടപ്പാക്കേണ്ട പദ്ധതികള്‍ സംബന്ധിച്ചാണ് വിവിധ മേഖലകളിലെ വിദഗ്ധരിൽനിന്നും പൊതുജനങ്ങളില്‍നിന്നും ആശയങ്ങള്‍ ക്ഷണിച്ചത്. ജില്ല പഞ്ചായത്തിന്‍റെ 2022-27 പഞ്ചവത്സര പദ്ധതി രൂപവത്കരണവുമായി ബന്ധപ്പെട്ട് വിദ്യാഭ്യാസം, ആരോഗ്യം തുടങ്ങി വിവിധ മേഖലകളിലെ വികസനം, സ്ത്രീകള്‍, കുട്ടികള്‍, ഭിന്നശേഷിക്കാര്‍, വയോജനങ്ങള്‍ എന്നിവരുടെ ക്ഷേമം സംബന്ധിച്ചെല്ലാം ആശയങ്ങള്‍ നല്‍കാം.
വിഷയ മേഖലയിലെ വിദഗ്ധര്‍ക്കും പൊതുജനങ്ങള്‍ക്കും വാട്‌സ്ആപ് /ഇ-മെയില്‍ /തപാല്‍ മുഖേന ആശയങ്ങള്‍ ജില്ല പഞ്ചായത്തിന് ലഭ്യമാക്കാമെന്ന് പ്രസിഡന്‍റ് സംഷാദ് മരക്കാര്‍ അറിയിച്ചു. നിർദേശങ്ങള്‍ മാര്‍ച്ച് എട്ടിനകം ലഭ്യമാക്കണം. പൊതുജനപങ്കാളിത്തം ഉറപ്പുവരുത്തിയും പ്രായോഗിക നിര്‍ദേശങ്ങള്‍ ഉള്‍ക്കൊള്ളിച്ചും സാധ്യമായ പദ്ധതികള്‍ ആവിഷ്‌കരിക്കാനാണ് ജില്ല പഞ്ചായത്ത് ഈ ഉദ്യമത്തിലൂടെ ശ്രമിക്കുന്നത്.
8281040062 എന്ന വാട്‌സ്ആപ് നമ്പറിലോ plandpwynd@gmail.com എന്ന ഇ-മെയിലിലോ ജില്ല പഞ്ചായത്ത് ഓഫിസ്, സിവില്‍ സ്റ്റേഷന്‍, കല്‍പറ്റ നോര്‍ത്ത്, വയനാട് എന്ന വിലാസത്തിലോ പദ്ധതി നിർദേശങ്ങള്‍ അയക്കാം.