ഉയരങ്ങൾ കീഴടക്കി 50 കാരി ദുബൈ വെറ്ററന്സ് ചാമ്പ്യന്ഷിപ്പിന് ഒരുങ്ങുന്നു
text_fieldsകല്പറ്റ: വെള്ളമുണ്ട ഒഴുക്കന്മൂല വട്ടക്കൊല്ലി ഷീന ദിനേശന് ദുബൈ വെറ്ററന്സ് സ്പോര്ട്സ് ആൻഡ് ഗെയിംസ് ചാമ്പ്യന്ഷിപ്പിനുള്ള ഒരുക്കത്തിലാണ്. ഒക്ടോബര് 27, 28, 29 തീയതികളിലാണ് ചാമ്പ്യന്ഷിപ്പ്. കേന്ദ്ര, സംസ്ഥാന കായിക മന്ത്രാലയങ്ങളുടെയും സ്പോര്ട്സ് കൗണ്സിലിന്റെയും സാമ്പത്തിക സഹായത്തിന്റെ അഭാവത്തില് ചാമ്പ്യന്ഷിപ്പ് കൈവിട്ടുപോകുമോ എന്ന ആശങ്കയിലാണെന്ന് 50കാരിയായ ഷീന. മേയ് 12 മുതല് 20 വരെ ദക്ഷിണ കൊറിയയില് നടന്ന ഏഷ്യന് പസഫിക് മാസ്റ്റേഴ്സ് ഗെയിംസില് രാജ്യത്തിനായി രണ്ട് വെള്ളി മെഡലുകളാണ് ഷീന നേടിയത്. 80 മീറ്റര് ഹര്ഡില്സിലും ഹാമര്ത്രോയിലും (നാല് കിലോഗ്രാം). വിവിധ സംഘടനകളുടേയും സ്ഥാപനങ്ങളുടേയും സഹകരണമാണ് കൊറിയയില് ഇന്ത്യയെ പ്രതിനിധാനം ചെയ്യാന് ഷീനക്ക് സഹായകമായത്. സമാനമായി ദുബൈ യാത്രയും സാധ്യമാകുമെന്ന വിശ്വാസത്തിലാണ് അവര്. 2024ല് അമേരിക്കയില് നടക്കുന്ന വേള്ഡ് മീറ്റിലേക്കും ഷീനയെ തിരഞ്ഞെടുത്തിട്ടുണ്ട്.
കണ്ണൂര് ജില്ലയിലെ മാതമംഗലം സ്വദേശിനിയാണ് ഷീന. ഹൈസ്കൂള് പഠനകാലത്തു സ്പോര്ട്സില് സജീവമായിരുന്ന അവര് 18 വര്ഷം മുമ്പാണ് വട്ടക്കൊല്ലി ദിനേശന്റെ ജീവിതസഖിയായി വെള്ളമുണ്ടയിലെത്തിയത്. ജീവിതയാത്ര തുടരുന്നതിനിടെ 2018ല് മാനന്തവാടിയില് കായിക മത്സരത്തിനു മകനു കൂട്ടുപോയ ഷീന മുതിര്ന്നവര്ക്കായി നടന്ന ഹാമര് ത്രോ മത്സരത്തിന് ഒന്നാം സ്ഥാനം നേടി. ഇത് അവരുടെ ജീവിതത്തില് വഴിത്തിരിവായി. കുടുംബത്തിന്റെ പിന്തുണയോടെ കായിക പരിശീലനത്തില് കൂടുതല് ശ്രദ്ധ ചെലുത്തിയ ഷീന പിന്നീട് സംസ്ഥാന, ദേശീയ, അന്തര്ദേശീയ വെറ്ററന്സ് മീറ്റുകളില് നിരവധി മെഡലുകള് നേടി.
2022 മേയില് തിരുവനന്തപുരത്ത് നടന്ന ദേശീയ മാസ്റ്റേഴ്സ് അത്ലറ്റിക്സ് മീറ്റില് ഷീന ഹാമര് ത്രോയില് സ്വര്ണവും ഡിസ്കസ് ത്രോയില് വെങ്കലവും നേടി. അതേവര്ഷം നവംബറില് നാസിക്കില് നടന്ന ദേശീയ വെറ്ററന്സ് ചാമ്പ്യന്ഷിപ്പിലും മികച പ്രകടനം കാഴ്ചെവച്ചു.
ഡിസ്കസ് ത്രോയില് ഒന്നാം സ്ഥാനം നേടിയ ഷീന ഹാമര് ത്രോ, ഷോട്ട്പുട്ട്, 200 മീറ്റര് ഓട്ടം, 400 മീറ്റര് റിലേ എന്നിവയില് രണ്ടാം സ്ഥാനവും കരസ്ഥമാക്കി. കഴിഞ്ഞ ഫെബ്രുവരിയില് വാരാണസിയില് നടന്ന ദേശീയ മാസ്റ്റേഴ്സ് മീറ്റിലും വ്യക്തിമുദ്ര പതിച്ചാണ് ഷീന മടങ്ങിയത്. മീറ്റില് ഹാമര് ത്രോയിലും 3,000 മീറ്റര് നടത്തത്തിലും സ്വര്ണം നേടിയ അവര് ഹര്ഡില്സ്, ഡിസ്കസ് ത്രോ എന്നിവയില് വെള്ളിയും 100, 400 മീറ്റര് റിലേകളില് വെങ്കലും കരസ്ഥമാക്കി. നാസിക്കില് നടന്ന മത്സരമാണ് സൗത്ത് കൊറിയല് ഏഷ്യ പസഫിക് മാസ്റ്റേഴ്സ് മീറ്റില് പങ്കെടുക്കുന്നതിനു വഴിതുറന്നത്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.