മലയോരങ്ങളിൽ സമരപരമ്പര; കർഷകർക്ക്​ പിന്തുണ പ്രഖ്യാപിച്ച്​ സഭകൾ

കൽപറ്റ: മലബാർ, ആറളം വന്യജീവി സ​ങ്കേതങ്ങൾക്കുചുറ്റും പരിസ്ഥിതി ലോല മേഖല പ്രഖ്യാപനത്തിനെതിരെ മലയോര മേഖല പ്രക്ഷുബ്​ധം. കരട്​ വിജ്ഞാപനം മലയാളത്തിലിറക്കണമെന്നും എതിർപ്പ്​ അറിയിക്കാൻ 60 ദിവസം നൽകണമെന്നും കേന്ദ്ര സർക്കാറിനോട്​ ഹൈക്കോടതി കഴിഞ്ഞദിവസംനിർദേശിച്ചത്​ ആശ്വാസകരമാണെങ്കിലും കർഷകരുടെ ആശങ്കയൊഴിയുന്നില്ല.

കേന്ദ്ര വനം- പരിസ്ഥിതി മന്ത്രാലയത്തി​െൻറ കരട്​ വിജ്ഞാപനത്തിനെതിരെ കർഷകർ വിവിധ സംഘടനകളുടെ ആഭിമുഖ്യത്തിൽ സമരം തുടങ്ങി. കർഷകരുടെ ആശങ്കയിൽ മൗനംപാലിക്കുന്ന സംസ്​ഥാന സർക്കാറിനെതിരെയും പ്രതിഷേധം ഉയർന്നു. ക്രൈസ്​തവ സഭകൾ കർഷക സമരങ്ങൾക്ക്​ പൂർണപിന്തുണ പ്രഖ്യാപിച്ചു. മെത്രാന്മാരും പുരോഹിതരും സമരമുഖങ്ങളിലുണ്ട്​.

മലബാർ വന്യജീവി സ​ങ്കേതത്തിനു ചുറ്റും 53.60 ചതുരശ്ര കിലോമീറ്ററും ആറളത്തി​െൻറ പേരിൽ 12.91 ചതുരശ്ര കിലോമീറ്ററും പരിസ്​ഥിതി ലോല മേഖലയാക്കാനാണ്​ നിർദേശം. കാർഷിക മേഖലയിലെ പ്രതിസന്ധിയും വന്യമൃഗ ശല്യവുംമൂലം പൊറുതിമുട്ടി സമരരംഗത്തുള്ള കർഷകർക്ക്​ ഇരുട്ടടിയാണ്​ ജനവാസകേന്ദ്രങ്ങളിൽ കൊണ്ടുവരുന്ന നിയന്ത്രണങ്ങൾ. മലയോര മേഖലയിൽ പഴം, പച്ചക്കറി, കിഴങ്ങുവർഗങ്ങൾ തുടങ്ങിയ കൃഷി വൻഭീഷണിയിലാണ്​.

ലക്ഷക്കണക്കിന്​ രൂപയുടെ കൃഷിനാശം വരുത്തുന്ന ആന, പന്നി, കുരങ്ങ്​ തുടങ്ങിയവയെ നിയന്ത്രിക്കാൻ വനംവകുപ്പിന്​ കഴിയുന്നില്ല. വന്യജീവി -മനുഷ്യ ഏറ്റുമുട്ടൽ പതിവായിട്ടും സർക്കാറി​െൻറ ഭാഗത്തുനിന്ന്​ ഇടപെടൽ ഇല്ലെന്ന പരാതിയിലാണ്​ കർഷകർ. ആദിവാസികളടക്കം വന്യജീവി ശല്യത്തി​െൻറ കെടുതികൾ നേരിടുന്നു. കടുവയും ആനയും ജീവൻ അപഹരിക്കുന്ന സംഭവങ്ങൾ കൂടിവരുകയാണ്​.

ജീവനും സ്വത്തിനും സംരക്ഷണം ആവശ്യപ്പെട്ടാണ്​​ മലയോര മേഖലയിൽ സമരങ്ങൾ രൂ​പപ്പെടുന്നത്​. ദേശീയ പാതയിൽ വന്യജീവികളുടെ പേരിൽ ഏർപ്പെടുത്തിയ രാത്രി യാത്ര നിരോധനം അടക്കം മലയോര ജനതയിൽ വൻ പ്രതിഷേധം സൃഷ്​ടിച്ചിട്ടുണ്ട്​.

നിർമാണം, കൃഷി,റോഡ്​, പാലം, വാഹനങ്ങൾ, വ്യവസായം തുടങ്ങിയവക്ക്​ നിയന്ത്രണം വരുന്നതും അനുമതി തേടി ജനങ്ങൾ ഉദ്യോഗസ്​ഥർക്കു മുന്നിൽ നിൽക്കേണ്ടിവരുമെന്ന ആ​ശങ്കയുമാണ്​ മലയോരത്തെ സമരഭരിതമാക്കുന്നത്​. അതിനിടെ മാനന്തവാടി, സുൽത്താൻ ബത്തേരി രൂപതകളും സമരം വ്യാപിപ്പിച്ച കാർഷിക പുരോഗമന സമിതിയും ചേർന്ന്​ വ്യാഴാഴ്​ച വയനാട്​ സംരക്ഷണ സമിതിക്ക്​ രൂപം നൽകി.

കോഴിക്കോട്​ ജില്ലയിലെ സമരങ്ങൾ താമരശ്ശേരി രൂപത ശക്​തമാക്കിയിട്ടുണ്ട്​. രണ്ടുമാസത്തിനകം വയനാട്​, കോഴിക്കോട്​, കണ്ണൂർ ജില്ലകളിലെ പതിനായിരത്തിലേറെ പേർ കർഷക സമരങ്ങളിൽ പങ്കാളിയായതായി കാർഷിക പുരോഗമന സമിതി ചെയർമാൻ പി.എം. ജോയി പറഞ്ഞു.