ഷോക്കേറ്റ് ചെരിഞ്ഞ കൊമ്പനെ കുഴിച്ചുമൂടി; മൂന്ന് കർഷകർ അറസ്​റ്റിൽ

ഗൂഡല്ലൂർ: കൃഷിയിടത്തിൽ ഷോക്കേറ്റ് ചെരിഞ്ഞ കൊമ്പനെ കുഴിച്ചുമൂടി. ഇതുമായി ബന്ധപ്പെട്ട് മൂന്ന് കർഷകർ അറസ്​റ്റിൽ. കർഷകരായ വിഗ്​നേശ്വരൻ (40), ഗോപാലകൃഷ്ണൻ (21), അജിത് കുമാർ (18) എന്നിവരാണ് അറസ്​റ്റിലായത്. ചിന്നകുന്നൂരിലെ ബെത്തട്ടി പെന്തൂർ ഗ്രാമത്തിലാണ് സംഭവം.

വന്യമൃഗങ്ങളുടെ വരവ് തടയാൻ ഉരുളക്കിഴങ്ങ് കൃഷിയിടത്തിൽ അനധികൃതമായി സോളാർ വേലി വെച്ചിരുന്നു. കഴിഞ്ഞ ദിവസം രാത്രിയെത്തിയ കൊമ്പൻ ഷോക്കേറ്റ് ചെരിഞ്ഞു. ഈ വിവരം മറച്ചുവെച്ച് മൂന്നുപേരും ചേർന്ന്​ ആനയുടെ ജഡം കുഴിച്ചുമൂടി.

സംശയം തോന്നിയ വനപാറാവുകാരൻ മഹേന്ദ്രനാണ് ഉന്നത അധികാരികൾക്ക് വിവരം നൽകിയത്. തുടർന്ന്​ വനപാലക സംഘം നടത്തിയ അന്വേഷണത്തിലാണ് കർഷകർ പിടിയിലായത്.