നരഭോജി കടുവയെ പിടികൂടാൻ 11 ലക്ഷം ചെലവായെന്ന്

ഗൂഡല്ലൂർ: മുതുമല കടുവ സങ്കേതപരിധിയിൽ നാലു മനുഷ്യരെ കൊല്ലുകയും മുപ്പതോളം കന്നുകാലികളെ കൊന്നു തിന്നുകയും ചെയ്ത നരഭോജി കടുവയെ ജീവനോടെ പിടിക്കാനുള്ള ദൗത്യത്തിനായി 11,34,105 രൂപ ചെലവിട്ടതായി വിവരം. ജില്ലയിലെ ഒരു അഭിഭാഷകൻ വിവരാവകാശപ്രകാരം ആരാഞ്ഞ ചോദ്യത്തിലാണ് വനംവകുപ്പ് മറുപടി നൽകിയത്. 23 ദിവസത്തെ തിരച്ചിലിനൊടുവിലാണ് കടുവയെ ജീവനോടെ പിടികൂടിയത്. കടുവയെ ജീവനോടെ തന്നെ പിടികൂടണമെന്ന് കോടതി ഉത്തരവും ഉണ്ടായിരുന്നു. അതിനാൽ തന്നെ മൂന്നാഴ്ചത്തെ ശ്രമഫലമായിട്ടാണ് കടുവയെ പിടികൂടാൻ കഴിഞ്ഞത്. മൈസൂരുവിലെ മൃഗങ്ങൾക്കുള്ള പുനരധിവാസ കേന്ദ്രത്തിൽ നിരീക്ഷണത്തിലാണ് T23 പേരിട്ട് വിളിക്കുന്ന കടുവ ഇപ്പോഴുള്ളത്. വയനാട്ടിലെ വനപാലകരുടെ ആർ.ആർ ടീം അടക്കം നൂറിലേറെ വനപാലക വിദഗ്ധസംഘമാണ് മസിനഗുഡി, മുതുമല, ശ്രീമധുര, ദേവൻഎസ്റ്റേറ്റ്, മേഫീൽഡ് ഉൾപ്പെടെയുള്ള ഭാഗങ്ങളിൽ തിരച്ചിൽ നടത്തിയത്. അവസാനം മസിനഗുഡിക്ക് സമീപമാണ് T23 കടുവ പിടിയിലായത്.