കെ.എസ്.ആർ.ടി.സി ജീവനക്കാരുടെ സമരം പൂർണം

മാനന്തവാടി: ശമ്പളം ഉൾപ്പെടെ വിവിധ ആവശ്യങ്ങൾ ഉന്നയിച്ച് കെ.എസ്.ആർ.ടി.സി ജീവനക്കാർ സംസ്ഥാന വ്യാപകമായി നടത്തിയ സമരം മാനന്തവാടി ഡിപ്പോയിൽ പൂർണം. ആകെയുള്ള 64 സർവിസിൽ ഒന്നുപോലും നടത്തിയില്ല. ദീർഘദൂര സർവിസുകൾ പോലും മുടങ്ങി. ഇതുകാരണം ഗ്രാമീണ മേഖലയിലെ യാത്രക്കാരും ദീർഘദൂര യാത്രക്കാരുമാണ് ഏറെ വലഞ്ഞത്. പലരും സമരമറിയാതെ ഡിപ്പോയിൽ എത്തിയപ്പോഴാണ് ബസില്ലാത്ത വിവരമറിയുന്നത്. സി.ഐ.ടി.യു സമരത്തിൽനിന്ന് വിട്ടു നിൽക്കുമെന്ന് പ്രഖ്യാപിച്ചിരുന്നെങ്കിലും അവരും സമരത്തിൽ പങ്കെടുക്കുന്നതാണ് മാനന്തവാടിയിൽ കണ്ടത്.