കെ.എസ്.ആർ.ടി.സി കൽപറ്റ വർക്​ഷോപ് നിർത്തലാക്കി

22 ജീവനക്കാരെ മാനന്തവാടിയിലേക്ക് മാറ്റി മാനന്തവാടി: കെ.എസ്.ആർ.ടി.സി വർക്​ഷോപ്പുകൾ ജില്ലയിൽ ഒന്നാക്കി വരുമാനം വർധിപ്പിക്കുന്നതിന്റെ ഭാഗമായി കൽപറ്റയിലെ വർക്​ഷോപ്പിന്റെ പ്രവർത്തനം ശനിയാഴ്ച മുതൽ നിർത്തലാക്കി. അവിടെയുള്ള 22 മെക്കാനിക്കൽ ജീവനക്കാരെ മാനന്തവാടി വർക്​ഷോപ്പിലേക്ക് മാറ്റി നിയമിച്ചു. ബസ് ചെക്കിങ്ങിനായി നാമമാത്രമായ ജീവനക്കാർ മാത്രമെ കൽപറ്റയിൽ ഉണ്ടാകൂ. ഒരു ജില്ലയിൽ ഒരു വർക്​ഷോപ്പ് മതിയെന്നാണ് മാനേജ്മൻെറ് നിലപാട്. എന്നാൽ, ബസുകൾ കൂടുതലുള്ള ജില്ലകളിൽ ഒന്നിൽ കൂടുതലാകാം. ഇതനുസരിച്ച് സുൽത്താൻ ബത്തേരിയിലെ വർക്​ഷോപ്പ് നിലനിൽക്കും. ഇതോടെ ബ്രേക്ക്, അപകടം മൂലമുള്ള കേടുപാടുകൾ എന്നിവക്ക്​ കൽപറ്റയിലെ ബസുകൾ മാനന്തവാടിയിൽ എത്തിക്കേണ്ടി വരും. ഇത് കൽപറ്റ ഡിപ്പോയുടെ പ്രവർത്തനങ്ങളെ സാരമായി ബാധിച്ചേക്കും. ജില്ലയിൽ 200ഓളം കെ.എസ്.ആർ.ടി.സി ബസുകളാണ് സർവിസ് നടത്തുന്നത്.