വയനാട്​ മെഡിക്കൽ കോളജ്​: വീണ്ടും നൂലാമാല

ഡി.എം. വിംസ് ഏറ്റെടുക്കില്ല; സ്വന്തം മെഡിക്കല്‍ കോളജ് സ്ഥാപിക്കുമെന്ന്​ സർക്കാർ വി. മുഹമ്മദലി കൽപറ്റ: വയനാട് ജില്ലയില്‍ ഗവ.​ മെഡിക്കൽ കോളജ്​ വിഷയം വീണ്ടും പുകയുന്നു. മേപ്പാടി അരപ്പറ്റ ഡി.എം വിംസ് സ്വകാര്യ മെഡിക്കല്‍ കോളജ് ഏറ്റെടുക്കാനുള്ള നിര്‍ദേശം വേണ്ടെന്നുവെക്കാനും സര്‍ക്കാര്‍ സ്ഥലം ഏറ്റെടുത്ത് മെഡിക്കല്‍ കോളജ് സ്ഥാപിക്കാനും മുഖ്യമന്ത്രി പിണറായി വിജയ​ൻെറ അധ്യക്ഷതയില്‍ തിരുവനന്തപുരത്ത്​ ചേര്‍ന്ന ഉന്നതതലയോഗം വ്യാഴാഴ്​ച തീരുമാനിച്ചതോടെയാണിത്​. മെഡിക്കൽ കോളജിനു വേണ്ടി വയനാടി​ൻെറ കാത്തിരിപ്പ്​ നീളുകയാണ്​. വിവിധ സ്​ഥലങ്ങളിൽ മെഡിക്കല്‍ കോളജ് സ്​ഥാപിക്കാൻ ശ്രമങ്ങൾ നടക്കുന്നതിനിടെയാണ്​ സ്വകാര്യ മെഡിക്കല്‍ കോളജ് ഏറ്റെടുക്കാനുള്ള നിര്‍ദേശം ഉയർന്നുവന്നത്​. ഡി.എം വിംസ് ഏറ്റെടുക്കുന്നത്​ പരിശോധിക്കാന്‍ ചീഫ് സെക്രട്ടറി അധ്യക്ഷനായ സമിതിയെ സര്‍ക്കാര്‍ നിയോഗിച്ചിരുന്നു. ഡി.എം വിംസി​‍ൻെറ ഉടമസ്ഥരായ ഡി.എം എജുക്കേഷനല്‍ റിസര്‍ച്ച് ഫൗണ്ടേഷന്‍ മുന്നോട്ടുവെച്ച നിര്‍ദേശങ്ങള്‍ അപ്രായോഗികമാണെന്നാണ്​ വിദഗ്ധ സമിതി അഭിപ്രായപ്പെട്ടതെന്ന്​ ഔദ്യോഗിക വാർത്തക്കുറിപ്പിൽ പറയുന്നു. ഇത് കണക്കിലെടുത്താണ് സ്വന്തം നിലയില്‍ മെഡിക്കല്‍ കോളജ് സ്ഥാപിക്കാന്‍ ഉന്നതയോഗം തീരുമാനിച്ചത്. കോളജിന് അനുയോജ്യമായ സ്ഥലം കണ്ടെത്താന്‍ ആരോഗ്യവകുപ്പിനെ ചുമതലപ്പെടുത്തിയിട്ടുണ്ട്​. വയനാട്ടിൽ ഇതിനകം സ്​ഥലം റവന്യൂ വകുപ്പ്​ ക​ണ്ടെത്തിയിട്ടുണ്ട്​. നേരത്തേ ഉമ്മൻ ചാണ്ടി സർക്കാറി​ൻെറ കാലത്ത്​ മടക്കിമലക്കടുത്ത്​ സൗജന്യമായി ലഭിച്ച സ്​ഥലം പിന്നീട്​ ഈ സർക്കാർ ജിയോളജി റിപ്പോർട്ട്​ ചൂണ്ടിക്കാട്ടി​ ഉപേക്ഷിക്കുകയായിരുന്നു. അതിനിടെ വയനാട് മെഡിക്കൽ കോളജ് സംബന്ധിച്ച്​ ഇടത് സർക്കാർ വഞ്ചന തുടരുകയാണെന്ന്​ യു.ഡി.എഫ്​ ആരോപിച്ചു. മാനന്തവാടി ജില്ല ആശുപത്രി, കൽപറ്റ ജനറൽ ആശുപത്രി എന്നിവ മെഡിക്കൽ കോളജിന്​ തുടക്കമിടാൻ അനു​േയാജ്യമാണെന്ന അഭിപ്രായം ഉയർന്നിട്ടുണ്ട്​. മെഡിക്കൽ കോളജിന്​ സൗജന്യമായി സ്​ഥലം നൽകാൻ ചിലർ മുന്നോട്ടുവന്നിട്ടുണ്ട്​. സർക്കാർ സ്​ഥലങ്ങളും ജില്ലയിലുണ്ട്​. ഡി.എം വിംസ് ഏറ്റെടുക്കുമെന്ന പ്രതീക്ഷയിൽ ഒരുക്കങ്ങൾ നടക്കുന്നതിനിടെയാണ്​ സർക്കാറി​ൻെറ പുതിയ തീരുമാനം. മാനന്തവാടി ജില്ല ആശുപത്രിയെ മെഡിക്കൽ കോളജ്​ ആക്കി ഉയർത്തണമെന്ന ഹരജിയിൽ ഒരു മാസത്തിനകം റിപ്പോർട്ട്​ നൽകണമെന്ന്​ ആരോഗ്യവകുപ്പ്​ സെക്രട്ടറിക്ക്​ ഹൈകോടതി കഴിഞ്ഞദിവസം നിർദേശം നൽകിയിട്ടുണ്ട്​.