തെന്നല ബാലകൃഷ്ണപിള്ള സംസ്ഥാന കോൺഗ്രസിലെ കാരണവർ -മുഖ്യമന്ത്രി

തിരുവനന്തപുരം: സംസ്ഥാന കോൺഗ്രസിലെ തറവാട്ട് കാരണവരായിരുന്നു തെന്നല ബാലകൃഷ്ണപിള്ളയെന്നും എല്ലാവരും ഹൃദയത്തിലാണ് അദ്ദേഹത്തെ പ്രതിഷ്ഠിച്ചതെന്നും മുഖ്യമന്ത്രി വി.ഡി. സതീശൻ. തെന്നല ബാലകൃഷ്ണപിള്ള നവതി ഫൗണ്ടേഷന്‍റെ നേതൃത്വത്തിൽ നടന്ന ഒന്നാം ചരമ വാർഷികാചരണം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാന കോൺഗ്രസിൽ ഏത് സങ്കീർണ പ്രശ്നമുണ്ടായാലും തെന്നലയായിരുന്നു പരിഹാരഫോർമുല. ഏത്ര വലിയ സംഘർഷാവസ്ഥയും കൈകാര്യം ചെയ്യാൻ അദ്ദേഹത്തിന് സാധിച്ചിരുന്നു. പാർട്ടിയിൽ വലിയ തർക്കങ്ങൾ ഉണ്ടായിരുന്ന ഘട്ടത്തിലും എല്ലാവരാലും അംഗീകരിക്കപ്പെടുന്ന അപൂർവ ഭാഗ്യം ലഭിച്ച വ്യക്തിയാണ് അദ്ദേഹം. 2001ൽ സംസ്ഥാനത്ത് പാർട്ടിയും മുന്നണിയും ഉജ്ജ്വല വിജയം നേടിയപ്പോൾ തന്നെ കെ.പി.സി.സി അധ്യക്ഷപദവി ഒഴിയേണ്ടിവന്നെങ്കിലും പാർട്ടി ഏൽപിച്ച ദൗത്യം ഭംഗിയായി നിറവേറ്റിയെന്ന സൗമ്യനിലപാടായിരുന്നു അദ്ദേഹത്തിനെന്നും മുഖ്യമന്ത്രി ചൂണ്ടിക്കാട്ടി.

സംസ്ഥാന കോൺഗ്രസിലെ പ്രശ്നങ്ങളുടെ ഒറ്റമൂലിയായിരുന്നു തെന്നല ബാലകൃഷ്ണപിള്ളയെന്ന് വി.എം. സുധീരൻ പറഞ്ഞു. ഫൗണ്ടേഷൻ ചെയർമാൻ കൂടിയായ ഐ.എൻ.ടി.യു.സി സംസ്ഥാന പ്രസിഡന്‍റ് ആർ. ചന്ദ്രശേഖരൻ അധ്യക്ഷത വഹിച്ചു. ഫൗണ്ടേഷൻ സെക്രട്ടറി ജി. വേണുഗോപാൽ, ട്രഷറർ കുമ്പളത്ത് ശങ്കുപ്പിള്ള എന്നിവരും സംസാരിച്ചു.