വയോധികന്‍റെ ജീവിതത്തിലേക്കൊരു സഡൻ ബ്രേക്ക്​ ഞെട്ടൽ മാറാതെ കെ.എസ്​.ആർ.ടി.സി ഡ്രൈവർ

തിരുവനന്തപുരം: സ്വന്തം കാലടിയിൽ അരഞ്ഞ്​ തീരുമായിരുന്ന വയോധികന്‍റെ ജീവൻ രക്ഷിച്ച ‘ഞെട്ടൽ’ മാറിയിട്ടില്ല കെ.എസ്.ആർ.ടി.സി നെയ്യാറ്റിൻകര ഡിപ്പോയിലെ ​ഡ്രൈവർ സജികുമാറിന്. വൈകീട്ട്​ 5.25. നഗരത്തിൽ നല്ല വാഹനത്തിരക്ക്. ചെറിയ മഴ തോർന്നതേയുള്ളൂ. കിഴക്കേകോട്ട-വിഴിഞ്ഞം-ആട്ടറമൂല-നെയ്യാറ്റിൻകരയാണ്​ സർവിസ്. റോഡ് പണി നടക്കുന്നതിനാൽ അട്ടക്കുളങ്ങരയിൽനിന്ന്​ ബസ് ബൈപാസിലേക്ക് തിരിച്ചുവിട്ടു. സിഗ്നൽ കഴിഞ്ഞ് വലത്തേക്ക് തിരിഞ്ഞ് അട്ടക്കുളങ്ങര മോഹൻ ഇലക്ടിക്കൽസിനു മുന്നിലെത്തിയപ്പോൾ ബസിനുള്ളിൽ ഒരു സ്ത്രീയുടെ നിലവിളി.

അതേ സെക്കന്‍ഡിൽ കാൽ ബ്രേക്കിലമർന്നതും ബസ് സുരക്ഷിതമായി നിന്നു. ‘ഒരാൾ വീണു, വീണു’ എന്ന് സ്ത്രീ ഉച്ചത്തിൽ. ഇടതുവശ​ത്തെ കണ്ണാടിയിലൂടെ ഡ്രൈവർ സജികുമാർ കണ്ടു​; ബസിന്‍റെ പിൻചക്രത്തിനടിയിൽ വീണുകിടക്കുന്ന വയോധികനെ. ഇതേസമയം, മോഹൻ ഇലക്​ട്രിക്സിലെ സി.സി ടി.വിയിൽ പതിഞ്ഞ വിഡിയോ ഇങ്ങനെ​: വേഗത്തിൽ കടന്നുപോകുന്ന പൊലീസ്​ ബസ്​ മുന്നി​ലെ കാറിനു​വേണ്ടി വേഗം കുറക്കുന്നു. അതേ ദിശയിൽ നടപ്പാതയിലുടെ നടക്കുന്ന വയോധികൻ. ഒരു ട്രാൻസ്​പോർട്ട്​ ബസും ​ഫ്രെയ്​മിൽ. ​ഇതിനിടയിലൂടെ സ്കൂട്ടറുകളും മറ്റും കടന്നുപോകുന്നു. ദൃശ്യത്തിന്‍റെ 11ാം സെക്കന്‍ഡിൽ നടപ്പാതയിലെ വയോധികന്‍റെ അടിപതറുന്നു. വേച്ചുവേച്ച്​ റോഡിലേക്ക്. ഫുട്​പാത്തും കഴിഞ്ഞ്​ മൂന്നടി മുന്നോട്ടേക്ക്​ വേച്ച്​ വീഴു​മ്പോൾ ട്രാൻസ്​പോർട്ട്​ ബസിന്‍റെ മുൻ ഭാഗത്ത്​ ചെന്നിടിച്ചു. ബസ്​ മുന്നോട്ടു തന്നെ. അടിപതറിയ കാലും ബസിലിടിച്ചതിന്‍റെ ആഘാതവുമായി അയാൾ റോഡി​ലേക്ക്​ മുഖമടിച്ചു വീണു.

ഈ സമയത്തായിരുന്നു ജനലരികിലിരുന്ന​ ബിന്ദുവിന്‍റെ നിലവിളി ഡ്രൈവർ കേട്ടത്​. ആ കരച്ചിലപ്പോൾ ജാഗ്രതയുടെ സൈറൺ വിളിയായിരുന്നു സജിക്ക്. നാട്ടുകാർ ചേർന്ന്​ വയോധികനെ എഴുന്നേൽപ്പിച്ചു. ബന്ധുക്കളെ വിളിച്ചുവരുത്തി പറഞ്ഞുവിട്ടതായും സമീപത്തെവ്യാപാരികളിൽനിന്ന്​ അറിഞ്ഞതായി സജി പറഞ്ഞു. 10 വർഷമായി കെ.എസ്​.ആർ.ടി.സി ഡ്രൈവറാണെങ്കിലും ആദ്യമായാണ്​ ഇങ്ങനെയൊരനുഭവം. കാലടിപ്പാടിൽ നിന്നു വലിയൊരു ദുരന്തം ഒഴിവായതിനെ ഞെട്ടലോടെയാണ്​ ഓർക്കുന്നതെന്നും അമേച്ചർ ഡബ്ബിങ്​ ആർടിസ്റ്റ്​​ കൂടിയായ ഡ്രൈവർ പറഞ്ഞു.