മയിലാടുംമുകളിൽ തെരുവുനായ് ശല്യം

പോത്തൻകോട്: അയിരൂപ്പാറ മയിലാടുംമുകൾ പരിസരപ്രദേശങ്ങളിലും തെരുവുനായ് ശല്യം രൂക്ഷം. മയിലാടുംമുകളിൽ കൃസ്തുദാസ് ഭവനിൽ വസന്തയുടെ ഇരുപത്തിയഞ്ചോളം മുട്ടക്കോഴികളെയാണ് ബുധനാഴ്ച രാത്രി തെരുവുനായ്ക്കൾ കടിച്ചുകൊന്നത്.

ഇരുമ്പുവലകൾ പൊട്ടിച്ചാണ് തെരുവുനായ്ക്കൾ കോഴിക്കൂട്ടിനകത്ത് കടന്നത്. കൂടിനകത്തുള്ള മുഴുവൻ കോഴികളെയും കടിച്ചുകൊന്ന് പകുതിയോളം കോഴികളെ കൊണ്ടു പോവുകയും ചെയ്തു. മുട്ട വിറ്റ് കിട്ടുന്ന തുകയിൽ നിന്ന് നിത്യചെലവ് നടത്തിയിരുന്ന കുടുംബത്തിനാണ് നഷ്ടമുണ്ടായത്. മയിലാടുംമുകൾ മുറമേൽ പ്രദേശങ്ങളിൽ തെരുവുനായ്ക്കളുടെ ശല്യം രൂക്ഷമാണ്.

തെരുവുനായ് ശല്യം രൂക്ഷമായിരിക്കുന്ന സാഹചര്യത്തിൽ പഞ്ചായത്ത് അധികൃതർ നടപടികൾ സ്വീകരിക്കണമെന്ന് മയിലാടുംമുകൾ വാർഡ് അംഗം സിന്ധു റാണി പറഞ്ഞു.