'കമ്യൂണിറ്റി ന്യൂട്രീഷൻ ഫോറ' ത്തിന്​ അംഗീകാരം

തിരുവനന്തപുരം: സമൂഹത്തിൽ പോഷകാഹാരത്തെക്കുറിച്ചുള്ള ബോധവത്​കരണം നടത്തിയതിന്​ 'കമ്യൂണിറ്റി ന്യൂട്രീഷൻ ഫോറ' ത്തിന്​ അംഗീകാരം. ലോകപ്രമേഹദിനത്തിൽ​ വിദ്യാഭ്യാസ സ്​ഥാപനങ്ങൾ കേന്ദ്രീകരിച്ച്​ 1,000 ലധികം വിദ്യാർഥികൾക്കും സ്​റ്റുഡൻറ്​ പൊലീസ്​ കേഡറ്റിനുമായി നൽകിയ ഓൺലൈൻ ബോധവത്​കരണത്തിനാണ്​ 'യൂണിവേഴ്​സൽ റെക്കോഡ്​ ഫോറം'നൽകുന്ന ഏഷ്യൻ റെക്കോഡ്​ ലഭിച്ചത്​. ഡയറ്റീഷ്യൻമാർ മാത്രം പങ്കെടുത്ത, തുടർച്ചയായി 10 മണിക്കൂർ നീണ്ട വെബിനാറിനാണ്​ റെക്കോഡ്​.

പദ്ധതിയിൽ പ​ങ്കെടുത്ത ശ്രീപ്രിയ ഷാജി, ഉമാകല്യാണി, ഷെറിൻ തോമസ്, സോണിയ ജോസഫ്, ജോതി ജെയിംസ്, സിന്ധു എസ്, നിസ്സിമോൾ, അനു എംവി, ശ്രുതി കെ, മൃദുല അരവിന്ദ്, സുചിത്ര കെ, ഷാക്കിറ സുമയ്യ എന്നിവർക്ക്​ തിരുവനന്തപുരം കവടിയാർ കൊട്ടാരത്തിൽ നടന്ന ചടങ്ങിൽ അശ്വതി തിരുനാൾ തമ്പുരാട്ടി മെഡലുകളും സർട്ടിഫിക്കറ്റുകളും വിതരണം ചെയ്​തു.

കോവിഡ്​ പോലുള്ള പകർച്ചവ്യാധികൾ വ്യാപകമാകുന്ന സാഹചര്യത്തിൽ പോഷകാഹാരത്തെക്കുറിച്ചുള്ള തെറ്റിദ്ധരിപ്പിക്കുന്ന വിവരങ്ങളെ തടയുക, ആരോഗ്യകരമായ ജീവിതശൈലിയെക്കുറിച്ച്​ പൊതുജനത്തെ ബോധവത്​കരിക്കുക തുടങ്ങിയ ലക്ഷ്യത്തോടെ കേരളത്തിൽ പ്രവർത്തിക്കുന്ന സംഘടനയാണ്​ 'കമ്യൂണിറ്റി ന്യൂട്രീഷൻ ഫോറം'.സംസ്​ഥാനത്തെ 84 സ്​കൂളുകളിൽ സംഘടന ഇതിനകം ബോധവത്​കരണ പരിപാടികൾ നടത്തിക്കഴിഞ്ഞു.