ഇനി നിയമസഭയിലേക്കേ ഉള്ളൂ, ശിഷ്ടകാലം കേരള രാഷ്ട്രീയത്തിലെന്ന് കെ. മുരളീധരൻ

തിരുവനന്തപുരം: കേരള രാഷ്ട്രീയത്തിലാണ് ശിഷ്ടകാലം ഉണ്ടാവുക എന്ന് യു.ഡി.എഫ് സ്ഥാനാർഥിയും വടകര എം.പിയുമായ കെ. മുരളീധരൻ. ഇനി ലോക്സഭയിലേക്കില്ലെന്ന് ആറ് മാസം മുമ്പ് തന്നെ താൻ പ്രഖ്യാപിച്ചതാണ്. നേമത്ത് മത്സരിക്കുന്ന താൻ ഇനി നിയമസഭയിലേക്കേയുള്ളൂ. അത് ഈ തെരഞ്ഞെടുപ്പ് വരുന്നതിന് മുൻപേ പ്രഖ്യാപിച്ചതാണെന്നും അദ്ദേഹം പറഞ്ഞു.

വടകര എം.പി എന്തുറപ്പിലാണ് നേമത്ത് മത്സരിക്കുന്നതെന്ന് ചോദിക്കുന്നവർ ആറ് എം.എൽ.എമാരെ കഴിഞ്ഞ തവണ ലോക്സഭയിലേക്ക് മത്സരിപ്പിച്ചത് എന്തുറപ്പിലാണെന്ന് ചിന്തിക്കണം. രാജ്യസഭാ എം.പി എം.വി ശ്രേയാംസ് കുമാറിന് കൽപ്പറ്റയിൽ മത്സരിക്കാമെങ്കിൽ തനിക്ക് നേമത്തും മത്സരിക്കാം.

60 ശതമാനം മുന്നോക്ക സമുദായവും 40 ശതമാനം ന്യൂനപക്ഷവും ഉള്ള മണ്ഡലമാണ് നേമം. ഭൂരിപക്ഷ ഏകീകരണം നടക്കില്ല. എല്ലാ വിഭാഗത്തിന്റെയും വോട്ട് യു.ഡി.എഫിന് കിട്ടുമെന്നും കെ. മുരളീധരൻ പറഞ്ഞു.