ക്ഷേത്രങ്ങളിലെ കാണിക്കവഞ്ചി മോഷണസംഘം പിടിയിൽ

തിരുവനന്തപുരം: ക്ഷേത്രങ്ങളിലെ കാണിക്കവഞ്ചി കവർച്ച നടത്തുന്ന രണ്ടംഗസംഘത്തെ പിടികൂടി. മണ്ണന്തല ചെഞ്ചേരി ഹരിശൈലം വീട്ടിൽ കിരൺ (24), മണ്ണന്തല ചെഞ്ചേരി ലക്ഷംവീട് കോളനിയിൽ ജിഷ്ണു (20) എന്നിവരെയാണ് പേരൂർക്കട പൊലീസ് അറസ്റ്റ് ചെയ്തത്.

24ന് രാത്രി അമ്പലംമുക്ക് പേരൂർ ശ്രീകൃഷ്ണസ്വാമി ക്ഷേത്രത്തിന്റെ കാണിക്കവഞ്ചി കുത്തിപ്പൊളിച്ച് പണം കവർന്ന കേസിലാണ് പ്രതികൾ വലയിലായത്. അന്നേ ദിവസം തന്നെ പ്രതികൾ രാത്രി മണമ്പൂർ ശ്രീമഹാഗണപതി ക്ഷേത്രത്തിന്റെ വഞ്ചി പൊളിച്ച് 20,000 രൂപ മോഷ്ടിച്ചതായും തെളിഞ്ഞു. പൊലീസ് വിശദമായ അന്വേഷണം നടത്തുമെന്ന് ഡെപ്യൂട്ടി കമീഷണർ അങ്കിത് അശോകൻ അറിയിച്ചു.

കന്റോൺമെന്റ് എ.സി.പി ദിനരാജിന്റെ നിർദേശപ്രകാരം പേരൂർക്കട എസ്.എച്ച്.ഒ സജികുമാർ, എസ്.ഐമാരായ സന്ദീപ്, രാകേഷ്, അനിൽകുമാർ, എസ്.സി.പി.ഒമാരായ നൗഫൽ, ഷംനാദ്, പ്രസന്നകുമാർ, മീന എന്നിവരടങ്ങിയ പൊലീസ് സംഘമാണ് പ്രതികളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.