ട്രെയിനിൽനിന്ന് കോടികളുടെ സ്വർണം മോഷ്​ടിച്ച എട്ടംഗ സംഘം പിടിയിൽ

തിരുവനന്തപുരം: ജൂവലറികളിലേക്ക്​ കൊണ്ടു പോയ രണ്ടര കോടി രൂപയുടെ സ്വർണം ട്രെയിനിൽനിന്ന് മോഷണം പോയ കേസിൽ ദിവസങ്ങൾക്ക്​ ശേഷം എട്ടു പ്രതികൾ അറസ്റ്റിലായി.

ആർ.പി.എഫ് ക്രൈം ഇന്‍റലിജൻസ് വിഭാഗവും തമിഴ്‌നാട് റെയിൽവേ പൊലീസും സംയുക്തമായി നടത്തിയ അന്വേഷണത്തിലാണ് എട്ടു പേരെ പിടികൂടിയത്. കൂടുതൽ പേർ സംഘത്തിൽ ഉൾപ്പെട്ടിട്ടുണ്ടോ എന്ന അന്വേഷണം നടന്നു വരികയാണ്. കഴിഞ്ഞ മാസം 16നാണ് ഗുരുവായൂർ-ചെന്നൈ എക്സ്​പ്രസ്​ ട്രെയിനിൽനിന്ന് സ്വർണം കവർന്നത്.

തിരുവനന്തപുരത്തിനടുത്തെ കുഴിത്തുറ സ്റ്റേഷനിൽ അതിരാവിലെയാണ് ബാഗിൽ കൊണ്ടു പോകുകയായിരുന്ന ഒന്നര കിലോയിലധികം വരുന്ന സ്വർണം കവർന്നത്. തിരുനെൽവേലി ഭാഗത്തെ ജ്വല്ലറികളിലേക്ക് കൊണ്ടുപോയ സ്വർണാഭരണങ്ങൾ അടങ്ങിയ ബാഗാണ് മോഷ്ടിക്ക​പ്പെട്ടത്​. കവർച്ചക്ക്​ ശേഷം കുഴിത്തുറയിൽ ഇറങ്ങി രക്ഷപെട്ട പ്രതികൾ തൃശൂരിൽ ഒത്തുകൂടുകയും സ്വർണാഭരണങ്ങൾ പങ്കിട്ടെടുക്കുകയും ചെയ്‌തുവെന്നാണ്​ കണ്ടെത്തൽ. റെയിൽവേ ക്രൈം ഇന്‍റലിജൻസ് വിഭാഗം നടത്തിയ ഊർജിത അന്വേഷണത്തിലാണ് പ്രതികൾ കുടുങ്ങിയത്. തൃശൂരിലും കുഴിത്തറയിലുമുള്ള അഞ്ഞൂറിലധികം സി.സി ടി.വി കാമറാദൃശ്യങ്ങൾ അന്വേഷണ സംഘം ശേഖരിക്കുകയും പരിശോധന നടത്തുകയും ചെയ്‌തതിൽ നിന്നാണ് പ്രതികളെ തിരിച്ചറിഞ്ഞത്.