സുഹൃത്തിനെ കൊലപ്പെടുത്തി വീട്ടിനുള്ളിൽ കുഴിച്ചിട്ട സംഭവത്തിൽ പ്രതി അറസ്​റ്റിൽ

വിതുര: സുഹൃത്തിനെ കൊലപ്പെടുത്തി വീട്ടിനുള്ളിൽ കുഴിച്ചിട്ട സംഭവത്തിൽ പ്രതി അറസ്​റ്റിൽ. മേമല പട്ടൻകുളിച്ച പാറ വേമ്പരയിൽ വീട്ടിൽ താജുദ്ദീൻ കുഞ്ഞ് (62) ആണ് അറസ്​റ്റിലായത്. പട്ടൻകുളിച്ച പാറയ്ക്കടുത്തുള്ള വനത്തിൽനിന്ന്​ ശനിയാഴ്ച രാത്രിയിലാണ് വിതുര പൊലീസ് ഇയാളെ പിടികൂടിയത്.

സുഹൃത്തായ മീനാങ്കൽ തണ്ണിക്കുളം കുന്നിൻപുറത്ത് വീട്ടിൽ മാധവ​െൻറ (50) മൃതദേഹമാണ് താജുദ്ദീ​െൻറ വീട്ടിനുള്ളിൽ കുഴിച്ചിട്ട നിലയിൽ കണ്ടെടുത്തത്. പ്രതി കുറ്റം സമ്മതിച്ചു. ദിവസങ്ങൾക്കുമുമ്പ് ഇരുവരും വീട്ടിനുള്ളിൽ മദ്യപിച്ചിരിക്കെ വഴക്കായി. താജുദ്ദീൻ മാധവനെ റബർ കമ്പ് ഉപയോഗിച്ച് തല്ലുകയും മാധവൻ നിലവിളിക്കുകയും ചെയ്തു.

ശബ്​ദം പുറത്തുകേൾക്കാതിരിക്കാൽ വായ പൊത്തിപ്പിടിച്ചു. അനക്കമില്ലാതായതോടെ താജുദ്ദീൻ പുറത്തിറങ്ങിപ്പോയി. തിരികെയെത്തിയപ്പോഴാണ് മരിച്ചതാണെന്ന് മനസ്സിലായത്. ശേഷം മൃതദേഹം പുറത്തേക്കെടുക്കാൻ ശ്രമിച്ചെങ്കിലും കഴിഞ്ഞില്ല. അതിനാൽ മുറിയിലെത്തിച്ച് തറയിൽ കുഴിച്ചുമൂടുകയായിരുന്നു. വീടിനു സമീപത്ത് ജോലിയിലേർപ്പെട്ടിരുന്ന തൊഴിലുറപ്പ് തൊഴിലാളികൾക്ക് അസഹ്യമായ ദുർഗന്ധം അനുഭവപ്പെട്ടതോടെ പൊലീസിനെ വിവരമറിയിക്കുകയായിരുന്നു. റൂറൽ എസ്​.പി ഡി. അശോകൻ, ഡിവൈ.എസ്.പി ഉമേഷ് കുമാർ, വിതുര ഇൻസ്പെക്ടർ എസ്. ശ്രീജിത്ത്, എസ്.ഐ എസ്.എൽ. സുധീഷ്, എ.എസ്.ഐ വിനോദ്, സജി, എസ്.സി.പി.ഒ പ്രദീപ്, സി.പി.ഒ നിതിൻ, ഷിജുറോബർട്ട്, വിജയൻ, ഷിബുകുമാർ, ഷാഡോ എസ്.ഐ സുനിലാൽ, എ.എസ്.ഐ ഷിബുകുമാർ എന്നിവരാണ് അറസ്​റ്റിന് നേതൃത്വം നൽകിയത്.